കോട്ടയം: എം.ജി സര്‍വകലാശാലാ കാമ്പസില്‍ മാധ്യമപ്രവര്‍ത്തകര്‍ക്ക് നിയന്ത്രണം ഏര്‍പ്പെടുത്തി.
ഇതുസംബന്ധിച്ച്‌ വൈസ് ചാന്‍സലറുടെ നിര്‍ദേശപ്രകാരം അസിസ്റ്റന്റ് രജിസ്ട്രാര്‍ ബിനോയ് സെബാസ്റ്റ്യനാണ് ഉത്തരവിറക്കിയത്.
മാധ്യമപ്രവര്‍ത്തകര്‍ സര്‍വകലാശാലയുമായി ബന്ധപ്പെട്ട വാര്‍ത്താ ശേഖരണത്തിനായി സര്‍വകലാശാലാ കാമ്പസില്‍ പ്രവേശിക്കും മുന്‍പ് വൈസ് ചാന്‍സലറുടെ മുന്‍കൂര്‍ അനുമതി വാങ്ങണമെന്നാണ് നിബന്ധന.
മഹാത്മ ഗാന്ധി സര്‍വകലാശാലയിലെ മാധ്യമവിലക്ക് ജനാധിപത്യവിരുദ്ധമെന്ന് കേരള പത്രപ്രവര്‍ത്തക യൂണിയന്‍ കുറ്റപ്പെടുത്തി.
രാഷ്‌ട്രപിതാവായ മഹാത്മ ഗാന്ധിയുടെ പേരിലുള്ള സര്‍വകലാശാല തന്നെ പൗരാവകാശങ്ങള്‍ക്ക് വിലക്കിന്റെ കരിമ്പടം മൂടുന്നത് അങ്ങേയറ്റം അപലപനീയമായ സന്ദേശമാണ് നല്‍കുന്നത്.
അടിയന്തരമായി ഉത്തരവ് പിന്‍വലിച്ചില്ലെങ്കില്‍ പ്രക്ഷോഭങ്ങളിലൂടെ അത് തിരുത്തിക്കാന്‍ രംഗത്ത് ഇറങ്ങേണ്ടി വരുമെന്ന് യൂണിയന്‍ പ്രസിഡന്റ് കെ. പി. റജിയും ജനറല്‍ സെക്രട്ടറി സുരേഷ് എടപ്പാളും മുന്നറിയിപ്പ് നല്‍കി.
.
