ഈരാറ്റുപേട്ട: മെഡി സെപ്‌ ആരോഗ്യ ഇന്‍ഷുറന്‍സ്‌ പദ്ധതിയില്‍ നിഷേധിച്ച ക്ലെയിം തുകയും കോടതി ചെലവും പിഴയും ഉള്‍പ്പെടെ 26,000 രൂപ നല്‍കാന്‍ കോട്ടയം ഉപഭോക്‌തൃതര്‍ക്കപരിഹാര കമ്മീഷന്‍ ഉത്തരവ്‌.
ഈരാറ്റുപേട്ട അഗ്നിരക്ഷാനിലയത്തിലെ ഫയര്‍ ആന്‍ഡ്‌ റെസ്‌ക്യൂ ഓഫീസര്‍ ജോബിന്‍ മാത്യു നല്‍കിയ കേസിലാണ്‌ വിധി.
ജോബിന്‍ മാത്യുവിന്റെ മാതാവ്‌ 2024 ജനുവരിയില്‍ തൊടുപുഴ ചാഴിക്കാട്ട്‌ ആശുപത്രിയില്‍ ചികിത്സ തേടിയിരുന്നു.
ചികിത്സയ്‌ക്കായി ആകെ 31,228 രൂപ ബില്‍ തുക വന്നതില്‍ 21,228 രൂപ മാത്രമാണ്‌ മെഡി സെപ്‌ അനുവദിച്ചത്‌.
ബാക്കി 10,000 രൂപ അനുവദിക്കണമെന്ന്‌ ആവശ്യപ്പെട്ട്‌ പദ്ധതിയെ സമീപിച്ചെങ്കിലും അനുകൂല തീരുമാനമുണ്ടായില്ല. തുടര്‍ന്നാണ്‌ ജോബിന്‍ മാത്യു കമ്മീഷനെ സമീപിച്ചത്‌.
കോടതി ചെലവും പിഴയും ഉള്‍പ്പെടെ 26,000 രൂപ നല്‍കാനാണ്‌ കോടതി ഉത്തരവിട്ടത്‌. മെഡി സെപ്‌ പദ്ധതിയുമായി ബന്ധപ്പെട്ട്‌ നിരവധി പരാതികള്‍ ഉയരുന്നുണ്ടെങ്കിലും ഇത്തരം വിഷയങ്ങളില്‍ ഉപഭോക്‌തൃകമ്മീഷനെ സമീപിക്കുന്നവര്‍ വിരളമാണ്‌.
വിധി സമാനമായ പരാതികള്‍ നേരിടുന്ന സംസ്‌ഥാന സര്‍ക്കാര്‍ ജീവനക്കാര്‍ക്ക്‌ പ്രതീക്ഷ നല്‍കുന്നത്‌ കൂടിയായിമാറി. കേസില്‍ പൂഞ്ഞാര്‍ സ്വദേശിനി അഡ്വ. എ.എസ്‌ ശ്രീലക്ഷ്‌മി ഹാജരായി.
