തിരുവനന്തപുരം: സംസ്ഥാനത്ത് അടുത്ത സാമ്പത്തിക വർഷത്തേക്കുള്ള മരുന്നുകളുടെ പർച്ചേസ് ഒക്ടോബറില് ആരംഭിക്കാൻ നടപടി.
കെഎംഎസ്സിഎല് അവലോകന യോഗത്തില് ആണ് തീരുമാനം. മരുന്ന് ക്ഷാമം എന്ന റിപ്പോർട്ടുകളുടെ അടിസ്ഥാനത്തിലാണ് അവലോകന യോഗം ചേർന്നത്. രാജ്യത്തെ രണ്ട് സംസ്ഥാനങ്ങളില് എങ്കിലും വിതരണം ചെയ്യുന്ന മരുന്നുകള് മാത്രമേ കേരളത്തിലും ലഭ്യമാക്കാവു എന്ന് നിർദേശം. വിലയടക്കമുള്ള മരുന്ന് സംഭരണ വിവരങ്ങള് വെബ്സൈറ്റില് പ്രസിദ്ധീകരിക്കാനും നടപടി. ആൻ്റിബയോട്ടിക്കുകള് ഉള്പ്പെടെയുള്ള ആവശ്യമരുന്നുകള് സ്റ്റോക്ക് ഉണ്ടെന്ന് കെഎംഎസ്സിഎല് മന്ത്രിയെ അറിയിച്ചു.
സംസ്ഥാനത്തെ സർക്കാർ ആശുപത്രികളാണ് മരുന്ന് ക്ഷാമത്തില് വലഞ്ഞത്. പ്രമേഹം ഉള്പ്പടെയുള്ള ജീവിതശൈലി രോഗങ്ങള്ക്കും കീമോതെറാപ്പിക്കും അപസ്മാരത്തിനും ഉയർന്ന രക്തസമ്മർദത്തിനും ഉപയോഗിക്കുന്ന മരുന്നുകള്ക്കുമാണ് ക്ഷാമം നേരിടുന്നത്.
മരുന്ന് ക്ഷാമം പൊതുജനത്തെ അറിയിക്കാതിരിക്കാനായി പരമാവധി ലോക്കല് പർച്ചേസിംഗ് നടത്താൻ ആശുപത്രികള് നിർദേശം ലഭിച്ചിരുന്നു. എന്നാല് ഭീമമായ കുടിശ്ശിക ബാക്കിയുള്ളതിനാല് സർക്കാർ ആശുപത്രികള്ക്ക് മരുന്നുകളും ഉപകരണങ്ങളും നല്കാൻ വിസ്സമ്മതിക്കുകയാണ് സ്വകാര്യ വിതരണക്കാർ.
പുതിയ സ്റ്റോക്ക് എത്തിയില്ലെങ്കില് സാഹചര്യം കടുപ്പമാകുമെന്ന് ആശുപത്രി അധികൃതർ ആരോഗ്യ വകുപ്പിനെ അറിയിച്ചിരുന്നു.
