മേലാറ്റൂർ: സംസ്ഥാനത്തെ സർക്കാർ ആശുപത്രികളിലെ മരുന്ന് ക്ഷാമം വൻ വിവാദമായതിന് പിന്നാലെ, സർക്കാർ കുടുംബാരോഗ്യകേന്ദ്രത്തില്‍ നിന്ന് കാലാവധി കഴിഞ്ഞ മരുന്ന് രോഗിക്ക് നല്‍കി എന്ന ഗുരുതര വീഴ്ചയും റിപ്പോർട്ട് ചെയ്യപ്പെട്ടിരിക്കുന്നു.
പൂന്താനം സർക്കാർ കുടുംബാരോഗ്യ കേന്ദ്രത്തില്‍ പനിക്ക് ചികിത്സ തേടിയെത്തിയ യുവാവിന് ആണ് കാലാവധി കഴിഞ്ഞ ആന്റിബയോട്ടിക് മരുന്ന് ലഭിച്ചത്. കീഴാറ്റൂർ കൊണ്ടിപറമ്പ് സ്വദേശിയായ 39 വയസുകാരനാണ് സർക്കാർ ആശുപത്രിയില്‍ നിന്ന് കാലാവധി കഴിഞ്ഞ സിപ്രോഫ്‌ലോക്‌സാസിൻ മരുന്ന് ലഭിച്ചത്. മരുന്നിന്റെ പാക്കറ്റില്‍ രേഖപ്പെടുത്തിയ കാലാവധി കഴിഞ്ഞതായി ശ്രദ്ധയില്‍പ്പെട്ടതോടെയാണ് സംഭവം പുറത്തറിഞ്ഞത്.
പനിയെ തുടർന്ന് ചൊവ്വാഴ്ചയാണ് യുവാവ് ചികിത്സ തേടി പൂന്താനം കുടുംബാരോഗ്യ കേന്ദ്രത്തിലെത്തിയത്. ഡോക്ടറുടെ കുറിപ്പിന്റെ അ‌ടിസ്ഥാനത്തില്‍ ആശുപത്രിയില്‍ നിന്ന് ലഭിച്ച മരുന്നിന്റെ പാക്കറ്റില്‍ 2026 ആഗസ്റ്റ് വരെയാണ് കാലാവധി രേഖപ്പെടുത്തിയിരുന്നത്. ഇത് ഒക്ടോബർ മൂന്നാം വാരം ആയി, അ‌തായത് മരുന്നിന്റെ കാലാവധി കഴിഞ്ഞിട്ട് രണ്ട് മാസം പിന്നിട്ടിരിക്കുന്നു.
രോഗിക്ക് ലഭിച്ചത് കാലാവധി കഴിഞ്ഞ മരുന്നാണ് എന്ന് ശ്രദ്ധയില്‍പ്പെട്ടതിന് പിന്നാലെ മരുന്ന് വിതരണത്തിലെ വീഴ്ചയും ചർച്ചയായി. പഴയ മരുന്നുകള്‍ ഒഴിവാക്കിയിരുന്നുവെന്നും അറിയാതെ, കാലാവധി കഴിഞ്ഞ മരുന്ന് വിതരണത്തില്‍ ഉള്‍പ്പെട്ടതാണെന്നുമാണ് അധികൃതരുടെ വിശദീകരണം. കാലാവധി കഴിഞ്ഞ ഈ മരുന്ന് ഇവിടെനിന്ന് മറ്റേതെങ്കിലും രോഗികള്‍ക്ക് നല്‍കിയിട്ടുണ്ടോ എന്നത് അ‌ടക്കമുള്ള കാര്യങ്ങള്‍ ഇനി അ‌റിയാനുണ്ട്.
എസ്‌എംഎ മരുന്ന് വിവാദം: സാംപിള്‍ മരുന്ന് തിരികെവാങ്ങി എസ്‌എടി ആശുപത്രി
തിരുവനന്തപുരം: എസ്‌എംഎ ബാധിതരായ കുട്ടികള്‍ക്ക് നല്‍കിയ മരുന്നിന്റെ കവറില്‍ 'ഫിസിഷ്യൻസ് സാംപിള്‍ അഥവാ ക്ലിനിക്കല്‍ ട്രയല്‍' എന്നു രേഖപ്പെടുത്തിയത് വൻ വിവാദമായതിന് പിന്നാലെ മരുന്നുകള്‍ തിരികെവാങ്ങി ആശുപത്രി. സ്പൈനല്‍ മസ്കുലർ അട്രോഫി ബാധിതർക്കു നല്‍കിയ റിസിഡിപ്ലാം മരുന്നിന്റെ സാംപിള്‍ ആണ് എസ്‌എടി ആശുപത്രി അധികൃതർ തിരികെവാങ്ങുകയും, കരാർ പ്രകാരമുള്ള മരുന്ന് നല്‍കുകയും ചെയ്തത്.
വെള്ളിയാഴ്ച എസ്‌എടിയില്‍ എത്തുന്ന രോഗികള്‍ക്കു നല്‍കാൻ മരുന്ന് ഇല്ലായിരുന്നു. നാറ്റ്കോ കമ്പനിയുമായാണ് മെഡിക്കല്‍ സർവീസസ് കോർപറേഷൻ കരാറില്‍ ഏർപ്പെട്ടിരുന്നത്. നാറ്റ്കോ കമ്പനി അധികൃതരെ ബന്ധപ്പെട്ടപ്പോള്‍ സാംപിള്‍ മരുന്ന് എത്തിക്കാമെന്നും കരാർ അനുസരിച്ചുള്ള മരുന്നു തിങ്കളാഴ്ച എത്തിക്കാമെന്നുമായിരുന്നു മറുപടി. ഇങ്ങനെ എത്തിച്ച മരുന്നിന്റെ കവറില്‍ 'ഫിസിഷ്യൻസ് സാംപിള്‍ അഥവാ ക്ലിനിക്കല്‍ ട്രയല്‍' എന്നു രേഖപ്പെടുത്തിയിരുന്നു. ഇത് വിവാദമാകുകയായിരുന്നു.
6 രോഗികള്‍ക്കാണു സാംപിള്‍ നല്‍കിയത്. പുറത്തെ കുറിപ്പു കണ്ടപ്പോള്‍ രോഗികളുടെ ബന്ധുക്കള്‍ ആശങ്ക അറിയിച്ചു. ഇതിനെ തുടർന്ന് മരുന്നുകള്‍ തിരികെ വാങ്ങിയതായും കരാർ പ്രകാരമുള്ള മരുന്ന് തിങ്കളാഴ്ച എത്തിയതിനാല്‍ ആ മരുന്നാണു വിതരണം ചെയ്യുന്നതെന്നും എസ്‌എടി ആശുപത്രി സൂപ്രണ്ട് അറിയിച്ചിട്ടുണ്ട്. അ‌തേസമയം, എസ്‌എംഎ രോഗം ബാധിച്ച കുട്ടികള്‍ക്ക് ഇന്ത്യൻ നിർമിത മരുന്ന് നല്‍കാൻ മടിക്കണ്ടെന്നാണ് ആരോഗ്യമന്ത്രിയുടെ നിലപാട്. എന്നാല്‍ രക്ഷിതാക്കളില്‍ ഇത് സംബന്ധിച്ച്‌ ആശങ്ക നിലനില്‍ക്കുന്നു, അ‌തിനാല്‍ത്തന്നെ ആരോഗ്യവകുപ്പ് നല്‍കിയ മരുന്ന് ഇപ്പോഴും കുട്ടികള്‍ക്ക് കൊടുക്കാൻ രക്ഷിതാക്കള്‍ തയാറായിട്ടില്ല.
