തിരുവനന്തപുരം: സംസ്ഥാനത്ത് വലിയ കോളിളക്കം സൃഷ്ടിച്ച മുട്ടില്‍ മരംമുറിക്കേസിന് സമാനമായ വനക്കൊള്ളയ്ക്ക് വീണ്ടും കളമൊരുക്കുമെന്ന കടുത്ത ആശങ്ക ഉയർത്തിയ കോട്ടയം ചീഫ് ഫോറസ്റ്റ് കണ്‍സർവേറ്ററുടെ (സി.സി.എഫ്) വിവാദ ഉത്തരവ് റദ്ദാക്കി.
പട്ടയഭൂമിയിലെ മരങ്ങള്‍ വ്യാപകമായി വെട്ടിമാറ്റാൻ പരോക്ഷ അനുമതി നല്‍കുന്ന സർക്കുലർ പരിസ്ഥിതി പ്രവർത്തകരുടെയും വനംവകുപ്പിലെ തന്നെ ഉന്നത ഉദ്യോഗസ്ഥരുടെയും ശക്തമായ എതിർപ്പിനെത്തുടർന്ന് വനംമന്ത്രി ഷിബു ബേബി ജോണ്‍ ഇടപെട്ടാണ് പിൻവലിപ്പിച്ചത്.
സെപ്റ്റംബർ എട്ടിനാണ് കോട്ടയം സി.സി.എഫ് വിവാദമായ സർക്കുലർ പുറത്തിറക്കിയത്. വനംമന്ത്രി പങ്കെടുത്ത ഒരു പൊതുപരിപാടിയില്‍ ഉയർന്ന പരാതികളുടെയും നിവേദനങ്ങളുടെയും അടിസ്ഥാനത്തിലാണ് ഉത്തരവ് ഇറക്കിയതെന്നായിരുന്നു ഉദ്യോഗസ്ഥരുടെ പ്രാഥമിക വിശദീകരണം.
എന്നാല്‍, മുട്ടില്‍ മോഡല്‍ കൊള്ളയ്ക്ക് പഴുതൊരുക്കുന്ന വ്യവസ്ഥകള്‍ സർക്കുലറില്‍ ഉള്‍പ്പെട്ടത് വകുപ്പിനുള്ളിലും പൊതുസമൂഹത്തിലും വലിയ പ്രതിഷേധത്തിന് ഇടയാക്കുകയായിരുന്നു.
തേക്ക്, ഈട്ടി, ചന്ദനം ഉള്‍പ്പെടെയുള്ള പ്രധാന പത്തിന സംരക്ഷിത മരങ്ങള്‍ ഒഴികെയുള്ളവ പട്ടയഭൂമിയില്‍നിന്ന് മുറിച്ചുമാറ്റാമെന്നായിരുന്നു ഉത്തരവിലെ പ്രധാന വ്യവസ്ഥ. വിലപിടിപ്പുള്ള പത്തിന മരങ്ങള്‍ക്ക് ഇളവ് നല്‍കിയിട്ടില്ലെങ്കിലും,
ഉത്തരവിന്റെ മറപിടിച്ച്‌ വാക, താന്നി, കുന്നി തുടങ്ങിയ നിരവധി കാട്ടു മരങ്ങള്‍ യഥേഷ്ടം വെട്ടിമാറ്റാനും കടത്താനും ഇത് വഴിയൊരുക്കുമെന്ന് പരിസ്ഥിതി സംഘടനകളും വനംവകുപ്പ് ഉദ്യോഗസ്ഥരും ചൂണ്ടിക്കാട്ടി.
ഉത്തരവിനെതിരെ പരിസ്ഥിതി സംഘടനയായ ആനിമല്‍സ് ആൻഡ് നേച്ചർ എത്തിക്സ് കമ്മ്യൂണിറ്റി ട്രസ്റ്റ് (ആനെക്‌ട്) ഉള്‍പ്പെടെയുള്ളവർ വനംമന്ത്രിയെ നേരിട്ട് കണ്ട് പരാതി നല്‍കിയിരുന്നു. സാഹചര്യം ഗൗരവതരമാണെന്ന് ബോധ്യപ്പെട്ടതോടെ മന്ത്രി അടിയന്തരമായി ഇടപെടുകയും ഉത്തരവ് റദ്ദാക്കാൻ നിർദ്ദേശം നല്‍കുകയുമായിരുന്നു.
വിഷയത്തില്‍ പൂർണ്ണമായ നിയമോപദേശം തേടിയ ശേഷവും എല്ലാ വശങ്ങളും വിശദമായി പരിശോധിച്ച ശേഷവും മാത്രമേ തുടർനടപടികളിലേക്ക് കടക്കാവൂ എന്ന് മന്ത്രി ഷിബു ബേബി ജോണ്‍ കർശന നിർദ്ദേശം നല്‍കിയിട്ടുണ്ട്
