കോട്ടയം: കോട്ടയത്ത് ശക്തമായ മഴ തുടരുന്നു. കോട്ടയം ജില്ലയുടെ കിഴക്കൻ മേഖലയില് അപ്രതീക്ഷിതമായ മഴവെള്ളപ്പാച്ചിലിലും വെള്ളപ്പൊക്കത്തിലും പല പ്രദേശങ്ങളും ഒറ്റപ്പെട്ടുവെന്ന് മാണി സി കാപ്പൻ എംഎല്എ പറഞ്ഞു.
ജനങ്ങള് ജാഗ്രത പാലിക്കണമെന്നും ഉരുള്പൊട്ടല് മണ്ണടിച്ചില് മേഖലകളില് അടിയന്തര സേവനം ലഭ്യമാക്കാൻ വകുപ്പുകള്ക്ക് നിർദ്ദേശം നല്കിയതായും എംഎല്എ പറഞ്ഞു.
മീനച്ചില് താലൂക്കിലെ വിവിധ ഭാഗങ്ങളില് വെള്ളം കയറി. ഈരാറ്റുപേട്ട, പൂഞ്ഞാർ, തീക്കോയി, ഭരണങ്ങാനം പ്രദേശങ്ങളിലെല്ലാം 2018 ന് സമാനമായിട്ടുള്ള വെള്ളപ്പൊക്കമാണെന്ന് റിപ്പോർട്ടുകള്. ഇടമറ്റം- ഈരാറ്റുപേട്ട റോഡുകള് വെള്ളത്തില് മുങ്ങിയിരിക്കുകയാണ്. ഇടമറ്റം - വളഞ്ഞങ്ങാനം പ്രദേശങ്ങളിലും വെള്ള കയറ്റം റിപ്പോർട്ട് ചെയ്തു.
