തിരുവനന്തപുരം: ക്യാബിനറ്റ് പദവി ലഭിക്കുന്നത് വൈകുന്നതില്‍ അതൃപ്തി അറിയിച്ച്‌ പാലാ എംഎല്‍എ മാണി സി. കാപ്പൻ.
മുഖ്യമന്ത്രിയെ നേരില്‍ കണ്ടാണ് മാണി സി കാപ്പൻ അതൃപ്തി അറിയിച്ചത്. ക്യാബിനറ്റ് റാങ്കോടെ നോർക്ക വൈസ് ചെയർമാൻ പദവി വേണമെന്നാണ് മാണി സി കാപ്പന്റെ ആവശ്യം.
മുസ്‌ലിം ലീഗിനും ഫോർവേഡ് ബ്ലോക്കിനും ക്യാബിനറ്റ് പദവി നല്‍കിയപ്പോള്‍ തന്നെ മറന്നുപോയോയെന്നും മാണി സി. കാപ്പൻ ചോദിക്കുന്നു.
മാണി സി. കാപ്പനെതിരെ ബോംബേ കോടതിയില്‍ നിന്നുണ്ടായ ഒരു നിയമനടപടിയാണ് പദവി ലഭിക്കാൻ കാലതാമസം നേരിടാൻ കാരണമെന്നാണ് കോണ്‍ഗ്രസ് വൃത്തങ്ങള്‍ സൂചിപ്പിക്കുന്നത്. എന്നാല്‍, മേല്‍കോടതിയില്‍ നിന്ന് തനിക്ക് അനുകൂലമായ ഉത്തരവ് ലഭിച്ചിട്ടും എന്തുകൊണ്ട് നിയമനം വൈകുന്നുവെന്നാണ് അദ്ദേഹം തിരിച്ചു ചോദിക്കുന്നത്.
പാലാ പോലുള്ള ഒരു മണ്ഡലത്തില്‍ ഘടകകക്ഷിയുടെ പ്രമുഖ നേതാവിനെ പരാജയപ്പെടുത്തിയത് വലിയ നേട്ടമാണെന്നും, അത് പരിഗണിച്ച്‌ തനിക്ക് പദവി നല്‍കുമെന്നായിരുന്നു യുഡിഎഫ് നേരത്തെ ഉറപ്പ് നല്‍കിയിരുന്നതെന്നുമാണ് അദ്ദേഹം മുഖ്യമന്ത്രിയെ ഓർമ്മിപ്പിച്ചിരിക്കുന്നത്.
