കോട്ടയം : മണർകാട് നിയന്ത്രണം നഷ്ടമായ ബൈക്ക് റോഡില് നിന്ന് തെന്നി സ്വകാര്യ ബസിനടിയിലേയ്ക്കു മറിഞ്ഞുണ്ടായ അപകടത്തിൽ യുവതിയ്ക്ക് ദാരുണാന്ത്യം. അയർക്കുന്നം കൊങ്ങാണ്ടൂർ വാലുമ്മേല്ക്കുന്നേല് വീട്ടില് 23കാരിയായ ശ്രീദേവി മനോജാണ് മരിച്ചത്. ഇവർ സഞ്ചരിച്ചിരുന്ന ബൈക്ക് ഓടിച്ചിരുന്ന സഹോദരനെ പരിക്കുകളോടെ ആശുപത്രിയില് പ്രവേശിപ്പിച്ചു.
ഇന്നു രാവിലെ ഏഴു മണിയോടെയാണ് സംഭവം. കോട്ടയം മണർകാട് പള്ളിയ്ക്കു സമീപത്ത് വച്ചാണ് അപകടം ഉണ്ടായത്. അയർക്കുന്നത് നിന്നും മണർകാട് കവലയിലേയ്ക്കു വരികയായിരുന്നു ഇവർ. ഈ സമയം മണർകാട് സെന്റ് മേരീസ് ആശുപത്രിയുടെ മുന്നിലെ വളവില് വച്ച് റോഡില് തെന്നിയ ബൈക്ക് മറിയുകയായിരുന്നു.
കോട്ടയത്ത് നിന്നും പാലായിലേയ്ക്കു പോകുകയായിരുന്ന സ്വകാര്യ ബസിന്റെ അടിയിലേയ്ക്കാണ് ബൈക്ക് മറിഞ്ഞത്. അപകടത്തില്പ്പെട്ട യുവതി സംഭവസ്ഥലത്തു വച്ച് തന്നെ മരിച്ചു. മൃതദേഹം ആശുപത്രി മോർച്ചറിയിലേയ്ക്കു മാറ്റി. സംഭവത്തില് മണർകാട് പൊലീസ് കേസെടുത്തു.
