തിരൂര്: മലപ്പുറം ആതവനാട് വെള്ളച്ചാട്ടത്തില് കുളിക്കാന് ഇറങ്ങിയ യുവാവ് മുങ്ങി മരിച്ചു.തിരൂർ സ്വദേശി ഷംസുദ്ദീൻ ആണ് മരിച്ചത്.
സുഹൃത്തുക്കൾക്കൊപ്പം വെള്ളച്ചാട്ടം സന്ദർശിക്കാനെത്തിയതായിരുന്നു ഷംസുദ്ദീൻ. നീന്തുന്നതിനിടെ ഷംസുദ്ദീൻ കയത്തിൽപ്പെടുകയായിരുന്നു.
ഉടൻ തന്നെ കരയ്ക്കെത്തിച്ച് സമീപത്തെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.
ചെന്നൈയിൽ സ്ഥിരതാമസക്കാരനായ ഇദ്ദേഹം ഇന്ന് വൈകുന്നേരം തിരികെ മടങ്ങാനിരിക്കെയാണ് ദാരുണമായ അപകടം സംഭവിച്ചത്.
അതേസമയം, കോഴിക്കോട് താമരശ്ശേരിയിലും ഇന്ന് സമാന രീതിയിൽ മുങ്ങിമരണം റിപ്പോർട്ട് ചെയ്തു. കൂടത്തായിയിൽ തോട്ടിൽ കുളിക്കാനിറങ്ങിയ ജോബി ജോസഫ് ആണ് മരിച്ചത്. നാട്ടുകാർ നടത്തിയ തിരച്ചിലിനൊടുവിലാണ് മൃതദേഹം കണ്ടെടുത്തത്.
