മാന്നാനം: സെന്റ് ജോസഫ്സ് ആശ്രമം പള്ളിയില് ഏല് റൂഹാ ബൈബിള് കണ്വെൻഷന്റെ രണ്ടാം ദിവസമായ ഇന്നലെ വിശ്വാസികളുടെ വൻ തിരക്ക്.
കടലുണ്ടി ഏല് റൂഹാ ധ്യാനകേന്ദ്രം ഡയറക്ടർ ഫാ. റാഫേല് കോക്കാടൻ സിഎംഐ വചന പ്രഘോഷണവും ആരാധനയും നയിച്ചു.
സിഎംഐ സഭയുടെ വികാരി ജനറല് ഫാ. ബെന്നി നല്ക്കരയുടെ മുഖ്യകാർമികത്വത്തില് നടന്ന വിശുദ്ധ കുർബാനയില് ഫാ. സിറിള് കളരിക്കല്, ഫാ. ജോഷി തേവലക്കര സിഎംഐ എന്നിവർ സഹകാർമികരായിരുന്നു.
ഇന്ന് വൈകുന്നേരം നാലിന് ജപമാലയോടെ കണ്വെൻഷൻ ആരംഭിക്കും. 4.30ന് വില്ലൂന്നി സെന്റ് സേവ്യേഴ്സ് പള്ളി വികാരി ഫാ. ഫിലിപ്പ് തയ്യിലിന്റെ മുഖ്യകാർമികത്വത്തില് വിശുദ്ധ കുർബാന. ഫാ. ജയ്ജിൻ കല്ലൂരം സിഎംഐ, ഫാ. ജോച്ചൻ കുറുപ്പശേരി സിഎംഐ എന്നിവർ സഹകാർമികരാകും.
തുടർന്ന് ഫാ. റാഫേല് കോക്കാടൻ സിഎംഐ വചനപ്രഘോഷണം നടത്തും. ആരാധനയ്ക്കു ശേഷം ഒമ്പതിന് കണ്വെൻഷൻ സമാപിക്കും.
കണ്വെൻഷൻ ഞായറാഴ്ച സമാപിക്കും. കണ്വെൻഷൻ പന്തലില് രോഗികള്ക്കും പ്രായമായവർക്കും പ്രത്യേക ഇരിപ്പിടങ്ങള് ഒരുക്കിയിട്ടുണ്ട്. വിപുലമായ പാർക്കിംഗ് സൗകര്യവും മാന്നാനത്തുനിന്ന് വിവിധ പ്രദേശങ്ങളിലേക്ക് വാഹന സൗകര്യവും ക്രമീകരിച്ചിട്ടുണ്ട്.
രാവിലെ ഒമ്പതു മുതല് ഉച്ചകഴിഞ്ഞ് മൂന്നു വരെ സ്പിരിച്വല് ഷെയറിംഗിനും 10 മുതല് മൂന്നു വരെ കുമ്പസാരത്തിനും സൗകര്യം ഒരുക്കിയിട്ടുണ്ട്.
ശനിയും ഞായറും ആശ്രമം പള്ളിയില് തിരുക്കർമങ്ങള് പതിവുപോലെ നടക്കുമെന്ന് പ്രിയോർ ഫാ. ജോസഫ് വട്ടപ്പറമ്പില് സിഎംഐ അറിയിച്ചു.





