അയർക്കുന്നം: വെള്ളപ്പൊക്കകാലത്ത് ഒറ്റപ്പെട്ടുപോകുന്ന പ്രദേശവാസികള്ക്ക് കൈത്താങ്ങായി അയർക്കുന്നം പഞ്ചായത്തിലെ പാറേക്കാട്ട് - വാഴോപ്പടി റോഡും ചൊറിച്ചിക്കടവ് പാലവും ഉയർത്തി നിർമിക്കുന്നതിനുള്ള നടപടികള്ക്ക് തുടക്കമായി.
പ്രവൃത്തികളുടെ ചെലവ് തിട്ടപ്പെടുത്തി അടിയന്തരമായി എസ്റ്റിമേറ്റ് തയാറാക്കാൻ പൊതുമരാമത്ത് റോഡ്സ് വിഭാഗം എക്സിക്യൂട്ടീവ് എൻജിനിയർക്കും പാലങ്ങള് (ബ്രിഡ്ജസ്) വിഭാഗം എക്സിക്യൂട്ടീവ് എൻജിനിയർക്കും ചാണ്ടി ഉമ്മൻ എംഎല്എ നിർദേശം നല്കി.
അയർക്കുന്നം പഞ്ചായത്തിലെ 20, 21 വാർഡുകളെ ബന്ധിപ്പിക്കുന്ന പ്രധാന പാതയാണ് പാറേക്കാട്ട്-വാഴോപ്പടി റോഡ്. വെള്ളപ്പൊക്ക സമയത്ത് ഈ പ്രദേശങ്ങളില് നിന്നുള്ളവർക്ക് പുറംലോകവുമായി ബന്ധപ്പെടാനും അയർക്കുന്നം, തിരുവഞ്ചൂർ ഭാഗങ്ങളിലേക്ക് എത്തിച്ചേരാനുമുള്ള ഏക യാത്രാമാർഗമാണിത്.
ദുരിതാശ്വാസ ക്യാമ്പുകളിലേക്ക് ഭക്ഷണവും അവശ്യവസ്തുക്കളും എത്തിക്കുന്നതിനും ഈ റോഡിനെയാണ് ആശ്രയിക്കുന്നത്.
എന്നാല്, പാറേക്കാട്ട് മുതല് ചൊറിച്ചിക്കടവ് പാലം വരെയുള്ള റോഡിനും പാലത്തിനും ആവശ്യത്തിന് ഉയരമില്ലാത്തതിനാല് മഴക്കാലത്ത് ഇവിടെ വെള്ളം കയറി ഗതാഗതം പൂർണമായും തടസപ്പെടുന്നത് പതിവാണ്.
കാലപ്പഴക്കത്താല് ചൊറിച്ചിക്കടവ് പാലം നിലവില് ഏറെ അപകടാവസ്ഥയിലുമാണ്.
ചൊറിച്ചിക്കടവ് പാലം കുറഞ്ഞത് ഒരു മീറ്ററോളം ഉയർത്തി പുനർനിർമിക്കണമെന്നും പാറേക്കാട്ട് മുതല് പാലം വരെയുള്ള റോഡ് വെള്ളം കയറാത്ത രീതിയില് ആവശ്യത്തിന് ഉയർത്തി ടാറിംഗ് നടത്തി സഞ്ചാരയോഗ്യമാക്കണമെന്നുമാണ് പ്രദേശവാസികളുടെ ദീർഘകാലമായുള്ള ആവശ്യം.





