തിരുവനന്തപുരം: കേരള പേപ്പർ ലോട്ടറിയുടെ മറവില്‍ സോഷ്യല്‍ മീഡിയയും ആർട്ടിഫിഷ്യല്‍ ഇന്റലിജൻസ് സാങ്കേതികവിദ്യകളും ഉപയോഗിച്ച്‌ വ്യാജ ലോട്ടറി നിർമ്മിക്കുകയും വില്‍ക്കുകയും ചെയ്യുന്ന സംഭവത്തില്‍ പ്രതികരണവുമായി മുഖ്യമന്ത്രി വി ഡി സതീശൻ.
സബ്മിഷന് നിയമസഭയില്‍ മറുപടി നല്‍കുകയായിരുന്നു അദ്ദേഹം.
ഒരേ ടിക്കറ്റ് തന്നെ നിരവധി ആളുകള്‍ക്ക് അനധികൃതമായി സാമൂഹികമാധ്യമങ്ങള്‍ വഴി വില്‍ക്കുന്നത് മൂലം സംസ്ഥാന ഖജനാവിന് വലിയ സാമ്പത്തിക നഷ്ടമാണ് ഉണ്ടാകുന്നത്.
ഇതിനുപുറമേ, ലോട്ടറി തൊഴിലാളികള്‍ക്കും സാധാരണക്കാരായ പൊതുജനങ്ങള്‍ക്കും ഇത് വലിയ കഷ്ടനഷ്ടങ്ങള്‍ ഉണ്ടാക്കുന്നുണ്ട്. ലോട്ടറി മേഖലയെ തകർക്കുന്ന രീതിയില്‍ വലിയൊരു ലോബിയായി, വൻ ക്രൈമായി ഇത് മാറിയിരിക്കുകയാണ്.
പ്രത്യേകിച്ച്‌ പാലക്കാട് പോലുള്ള ജില്ലകളിലാണ് ഈ തട്ടിപ്പ് ഏറ്റവും കൂടുതലായി കാണപ്പെടുന്നതെന്ന് മറുപടിയില്‍ വ്യക്തമാക്കി.
സംഭവത്തില്‍ ലോട്ടറി വകുപ്പ് നിലവില്‍ കർശന നടപടികളാണ് സ്വീകരിക്കുന്നത്. ലോട്ടറി റഗുലേഷൻ ആക്‌ട് അനുസരിച്ച്‌ ഇത്തരത്തില്‍ ക്രമക്കേട് നടത്തിയാല്‍ രണ്ട് വർഷം വരെ തടവ് ശിക്ഷ ലഭിക്കാവുന്ന വലിയ ക്രിമിനല്‍ കുറ്റമാണിത്.
വ്യാപകമായി വ്യാജ ലോട്ടറി അച്ചടിച്ചു വില്‍ക്കുകയും, എ.ഐ സാങ്കേതികവിദ്യ ഉപയോഗിച്ച്‌ അത് യാഥാർത്ഥ്യമാണെന്ന് ആളുകളെ തെറ്റിദ്ധരിപ്പിക്കുകയുമാണ് ചെയ്യുന്നത്. ചെറിയ സമ്മാനങ്ങള്‍ നല്‍കി വിശ്വസിപ്പിക്കുകയും ചെറിയാൻ സമ്മാനം ലഭിക്കുമ്പോള്‍ ഫോണ്‍ ഓഫ് ചെയ്ത് മുങ്ങുകയും ചെയ്യുന്ന വലിയ തട്ടിപ്പാണ് ഇതിന് പിന്നില്‍ നടക്കുന്നത്.
ഈ തട്ടിപ്പുകാരെ മുഴുവൻ നിയമത്തിന് മുന്നില്‍ കൊണ്ടുവരാനുള്ള കർശനമായ നടപടികള്‍ സർക്കാർ സ്വീകരിക്കും. വലിയ സാമ്പത്തിക നഷ്ടമാണ് ഇതിലൂടെ സർക്കാരിന് ഉണ്ടാകുന്നതെന്നും മുഖ്യമന്ത്രി സഭയെ അറിയിച്ചു.
