ഡൽഹി: ഡൽഹിയില് പിടിയിലായ ലോറൻസ് ബിഷ്ണോയ് സംഘത്തിലെ രണ്ട് ഷൂട്ടർമാർ ഉന്നമിട്ടത് ബോളിവുഡ് താരം അമിതാഭ് ബച്ചനെയാണെന്ന് സ്പെഷ്യല് സെല് വൃത്തങ്ങള്.
അമിതാഭ് ബച്ചന്റെ വസതിക്ക് മുന്നില് വെടിവെപ്പ് നടത്താനായിരുന്നു നീക്കം. സല്മാൻ ഖാൻ, ആമിർ ഖാൻ, രണ്വീർ സിംഗ്, കപില് ശർമ്മ, ഗുരു രണ്ധാവ തുടങ്ങിയ താരങ്ങളെയും സംഘം ലക്ഷ്യമിട്ടിരുന്നുവെന്നാണ് കണ്ടെത്തല്.
അതേസമയം സബർമതി ജയിലില് ബിഷ്ണോയിയെ സന്ദർശിക്കാൻ എത്തിയവരുടെ വിശദാംശങ്ങളും ഡൽഹി പൊലീസ് തേടിയിട്ടുണ്ട്.
അമിതാഭ് ബച്ചന്റെ മുംബൈയിലെ വസതിക്ക് മുന്നില് വെടിവെപ്പ് നടത്താൻ പദ്ധതിയിട്ടെന്ന് അറസ്റ്റിലായ ഷൂട്ടർമാർ ചോദ്യം ചെയ്യലില് വെളിപ്പെടുത്തിയെന്നാണ് സെപ്ഷ്യല് സെല് വൃത്തങ്ങള് പറയുന്നത്.
ഇത് സംബന്ധിച്ച് ഗൂഢോലോചനയ്ക്കായി സംഘം മുംബൈയില് എത്തിയിരുന്നു. കഴിഞ്ഞ ദിവസമാണ് വികാസ് താക്കൂർ, ദീപക് സിംഗ് എന്നിവരെ സെപ്ഷ്യല് സെല് പിടികൂടിയത്. മുംബൈ പൊലീസിന്റെ സഹായത്തോടെയാണ് ഇരുവരെയും ഡൽഹി പൊലീസ് പിടികൂടിയത്.
മുംബൈയില് തുടരാനും ബച്ചന്റെ വസതിക്ക് മുന്നില് ആക്രമണം നടത്താനും ദീപക് സിംഗിന് നിർദ്ദേശം ലഭിച്ചിരുന്നുവെന്നാണ് വിവരം. റിപ്പോർട്ട് പുറത്തുവന്നതിന് പിന്നാലെ അതിജീവിച്ചു എന്ന് അമിതാഭ് ബച്ചന് ഏക്സില് കുറിച്ചിരുന്നു.
എന്നാല് ആക്രമണവുമായി ബന്ധപ്പെട്ടാണോ പോസ്റ്റെന്ന് വ്യക്തമല്ല. സല്മാൻ ഖാൻ, ആമിർ ഖാൻ, രണ്വീർ സിംഗ്, കപില് ശർമ്മ, ഗുരു രണ്ധാവ എന്നിവരും ഇവരുടെ ഹിറ്റ് ലിസ്റ്റില് ഉണ്ടായിരുന്നു.
ഭീഷണി സാഹചര്യം കണക്കിലെടുത്ത് താരങ്ങളുടെ സുരക്ഷ മുംബൈ പൊലീസ് നേരത്തേ കൂട്ടിയിരുന്നു.






