തിരുവനന്തപുരം : സംസ്ഥാനത്തെ 38 തദ്ദേശവാര്‍ഡുകളിലേക്ക് നടന്ന ഉപതിരഞ്ഞെടുപ്പില്‍ നേട്ടമുണ്ടാക്കാനാകാതെ യുഡിഎഫ്. 19 സീറ്റില്‍ യുഡിഎഫും 18 സീറ്റില്‍ എല്‍ഡിഎഫും വിജയിച്ചു. എറണാകുളം ജില്ലയിലെ പൂതൃക്ക പഞ്ചായത്തില്‍ ട്വന്റി-ട്വന്റി സിറ്റിംഗ് സീറ്റ് നിലനിര്‍ത്തി. നിയമസഭാ തിരഞ്ഞെടുപ്പിലെ വമ്പൻ വിജയത്തിന് ശേഷമുള്ള ആദ്യ തിരഞ്ഞെടുപ്പിൽ തന്നെ യുഡിഎഫിന്റെ പ്രഭ മങ്ങിയിരിക്കുകയാണ്.
38 സീറ്റില്‍ നിലവില്‍ 22 ഇടത്ത് യുഡിഎഫും 15 ഇടത്ത് എല്‍ഡിഎഫുമായിരുന്നു. എന്നാല്‍ 22ല്‍ നിന്ന് 19 ആയി യുഡിഎഫ് സീറ്റുകളുടെ എണ്ണം കുറഞ്ഞു. മൂന്ന് സീറ്റ് അധികം നേടി എല്‍ഡിഎഫ് നേട്ടമുണ്ടാക്കി. പത്തനംതിട്ട കുന്നന്താനം പഞ്ചായത്തിലെ രണ്ടാം വാര്‍ഡിലും, മലപ്പുറം താനാളൂര്‍ പഞ്ചായത്തിലെ ഒന്നാം വാര്‍ഡിലും രണ്ടാമതെത്തിയതാണ് ബിജെപിയുടെ ആശ്വാസം.
കോട്ടയം തൃക്കോടിത്താനം ഡിവിഷന്‍ എല്‍ഡിഎഫ് പിടിച്ചെടുത്തത് യുഡിഎഫിന് ക്ഷീണമായി. നഗരസഭകളില്‍ രണ്ടിടത്ത് എല്‍ഡിഎഫും ഒരിടത്ത് യുഡിഎഫിനുമാണ് ജയം. ഏഴ് ബ്ലോക് പഞ്ചായത്തില്‍ അഞ്ചിടത്ത് എല്‍ഡിഎഫിനും രണ്ടിടത്ത് യുഡിഎഫിനും ജയം. പതിനൊന്ന് ഗ്രാമപഞ്ചായത്ത് വാര്‍ഡുകളില്‍ നേട്ടമുണ്ടാക്കിയത് യുഡിഎഫാണ്. എട്ട് വാര്‍ഡുകളില്‍ യുഡിഎഫ് ജയിച്ചു. രണ്ടിടത്താണ് എല്‍ഡിഎഫ് ജയം.
