ഡല്ഹി: അടുത്ത ആറ് മാസത്തിനുള്ളില് എല് നിനോ പ്രതിഭാസത്തിന്റെ ഫലമായി നാലര ലക്ഷം ആളുകള് മരണപ്പെടുമെന്ന് കാലാവസ്ഥാ വിദഗ്ദ്ധരുടെ മുന്നറിയിപ്പ്.
2026 സെപ്തംബറിനും 2027 ഫെബ്രുവരിക്കുമിടയിലെ കാലഘട്ടത്തില് ലോകം വലിയ ദുരന്തം നേരിടുമെന്നാണ് മുന്നറിയിപ്പ്. ആഗോള ദക്ഷിണമേഖലയിലായിരിക്കും കൂടുതല് ആഘാതമുണ്ടാവുകയെന്നും ശാസ്ത്രജ്ഞർ ചൂണ്ടിക്കാട്ടുന്നു. 1996 മുതല് 2025ലെ കണക്കുകള് പ്രകാരം സാധാരണയായി ഒരു വർഷത്തില് ചൂട് മൂലം മരണപ്പെടുന്ന ആളുകളുടെ ഏകദേശ കണക്കിനും അപ്പുറത്തുള്ള സഖ്യയാണിത്. വരള്ച്ച, വെള്ളപ്പൊക്കം, കാട്ടുതീ എന്നിവ മൂലമുള്ള മരണങ്ങള്ക്കും എല് നിനോ കാരണാകുമെന്ന് ശാസ്ത്രജ്ഞർ ചൂണ്ടിക്കാട്ടുന്നു.
എന്താണ് എല് നിനോ?
ഭൂമദ്ധ്യരേഖയ്ക്ക് മദ്ധ്യ-കിഴക്ക് സമുദ്രോപരിതലം ചൂടുപിടിക്കുന്ന പ്രതിഭാസമാണ് എല്നിനോ. രണ്ടുമുതല് ഏഴുവർഷങ്ങളുടെ വ്യത്യാസത്തില് എല് നിനോ ആവർത്തിക്കാൻ സാദ്ധ്യതയുണ്ട്. എല്നിനോ അനുഭവപ്പെടുന്ന കാലത്ത് ഇന്ത്യയില് മണ്സൂണ് മഴ കുറയുന്ന സാഹചര്യം മുൻപും ഉണ്ടായിട്ടുണ്ട്. 1980 മുതല് 14 തവണയാണ് എല്നിനോ സംഭവിച്ചിട്ടുള്ളത്. ഇതില് ഒമ്പത് തവണയും മണ്സൂണ് മഴ സാധാരണയിലും കുറവാണ് ലഭിച്ചത്. പസഫിക് സമുദ്രത്തിലെ താപനിലാ വ്യത്യാസം മണ്സൂണ് കാറ്റുകളുടെ ശക്തി കുറയുന്നതിന് ഇടയാക്കും. അതേസമയം, 1997ല് എല്നിനോ ഉണ്ടായിട്ടും ഇന്ത്യയില് മണ്സൂണ്കാലം സാധാരണമായിരുന്നു.
എല് നിനോ കൂടുതല് ബാധിക്കുന്ന രാജ്യങ്ങളും പ്രതീക്ഷിക്കുന്ന മരണനിരക്കും
നൈജീരിയ - 31,320
ഇൻഡോനേഷ്യ - 19,251
സുഡാൻ - 17,430
ഇന്ത്യ - 15,670
ബ്രസീല് - 13,271
കോംഗോ - 10,014
നൈഗർ - 9,900
ചാഡ് - 7,953
ഫിലിപ്പീൻസ് - 6,504
വിയറ്റ്നാം - 5,566
ഗോഡ്സില്ല ലെവല്
നിലവില് എല് നിനോ ഇതുവരെ രേഖപ്പെടുത്തിയിട്ടുള്ളതില് വച്ച് ഏറ്റവും ഉയർന്ന താപനിലയും മറികടന്നിരിക്കുകയാണ്. മുൻകാലങ്ങളിലെ സമാന പ്രതിഭാസങ്ങളെ അപേക്ഷിച്ച് എല് നിനോയുടെ താപവർദ്ധനവ് വലുതായതിനാല് ശാസ്ത്രജ്ഞർ ഇതിനെ 'ഗോഡ്സില്ല ലെവല്' എന്നാണ് വിശേഷിപ്പിക്കുന്നത്. എല് നിനോ പ്രകൃതിദത്തമായ കാലാവസ്ഥാ പ്രതിഭാസമാണെങ്കിലും ആഗോളതാപനം മൂലം ഇതിന്റെ തീവ്രത വർദ്ധിച്ചേക്കാമെന്ന് ശാസ്ത്രജ്ഞർ പറയുന്നു. 2027 ഫെബ്രുവരി വരെയുള്ള കാലയളവിലെ മരണനിരക്കാണ് ശാസ്ത്രജ്ഞർ പുറത്തുവിട്ടതെങ്കിലും എല് നിനോയുടെ സ്വാധീനം മൂലമുണ്ടാകുന്ന മരണങ്ങള് 2027 ജൂലായ് വരെ നീളാമെന്നും വിവരമുണ്ട്.
എല് നിനോ മൂലമുണ്ടാകുന്ന മറ്റ് പ്രത്യാഘാതങ്ങള്
ഭക്ഷണ വിതരണത്തെയും എല് നിനോ സാരമായി ബാധിക്കാനിടയുണ്ട്. ലോകത്താകമാനമുള്ള 50 ദശലക്ഷം ആളുകളെ ഇത് കടുത്ത പട്ടിണിയിലേയ്ക്ക് തള്ളിവിടുമെന്ന് വേള്ഡ് ഫുഡ് പ്രോഗ്രാം മുന്നറിയിപ്പ് നല്കുന്നു. 1877-1878 കാലഘട്ടത്തിലുണ്ടായ അതിശക്തമായ എല് നിനോ പ്രതിഭാസം മൂലമുണ്ടായ വരള്ച്ചയിലും ക്ഷാമത്തിലും അഞ്ചുകോടിയിലധികം പേർക്കാണ് ജീവൻ നഷ്ടപ്പെട്ടത്. ഇന്ത്യ, ബ്രസീല്, ചൈന എന്നീ രാജ്യങ്ങളെയാണ് ഇത് രൂക്ഷമായി ബാധിച്ചത്.
ലോകത്ത് ഇതുവരെ കാണാത്ത ദുരന്തമായിരിക്കും എല് നിനോ പ്രതിഭാസം മൂലമുണ്ടാവുകയെന്ന് ശാസ്ത്രജ്ഞർ വ്യക്തമാക്കുന്നു. ആരോഗ്യം, ഭക്ഷ്യ സുരക്ഷ, വെള്ളത്തിന്റെ ലഭ്യത എന്നിവയെ സാരമായി ബാധിക്കും. ജൈവ ഇന്ധനം (ഫോസില് ഫ്യുയല്) കത്തിക്കുന്നത് തുടർന്നാല് സാഹചര്യങ്ങള് കൂടുതല് ദുഷ്കരമാകുമെന്നും മുന്നയിപ്പുണ്ട്.
എല് നിനോയുടെ ലക്ഷണങ്ങള്
എല് നിനോയുടെ ആഘാതം മൂലമുള്ള ലക്ഷണങ്ങള് ലോകത്തിന്റെ പല ഭാഗങ്ങളിലും കണ്ട് തുടങ്ങിയിട്ടുണ്ട്. ഇതുവരെ രേഖപ്പെടുത്തിയതില് വച്ച് ഏറ്റവും ചൂടേറിയ ഓഗസ്റ്റ് മാസമായിരുന്നു 2026 ഓഗസ്റ്റ്. 16.96 ഡിഗ്രി സെല്ഷ്യസ് എന്ന ആഗോള ശരാശരി ഉപരിതല - വായു താപനിലയാണ് ഈ ഓഗസ്റ്റില് രേഖപ്പെടുത്തിയത്. എക്കാലത്തെയും ഏറ്റവും ചൂടേറിയ മാസമായി രേഖപ്പെടുത്തപ്പെട്ട 2023 ജൂലായ്ക്ക് തുല്യമായ നിലയിലായിരുന്നു ഇത്. ദീർഘകാല ആഗോളതാപനത്തെയും അതിവേഗം രൂപപ്പെടുന്ന എല് നിനോ സാഹചര്യങ്ങളെയും പ്രതിഫലിപ്പിക്കുന്നതാണ് ഇതെന്ന് കാലാവസ്ഥാ വിദഗ്ദ്ധർ വ്യക്തമാക്കുന്നു. ഇന്ത്യ അടുത്ത വേനല്ക്കാലത്തേക്ക് ചുവട് വയ്ക്കുന്നതിനിടെയാണ് പുതിയ മുന്നറിയിപ്പുകള് എന്നതും ആശങ്ക വർദ്ധിപ്പിക്കുന്നു.
