പെരുമ്പാവൂർ: എറണാകുളം പെരുമ്പാവൂരില്‍ ഇടിമിന്നല്‍. നിരവധി വീടുകള്‍ക്ക് നാശനഷ്ടം സംഭവിച്ചു.
വെങ്ങോല പഞ്ചായത്ത് പാലായിക്കുന്ന് പ്രദേശത്ത് ഇടിമിന്നലില്‍ പത്തോളം വീടുകള്‍ നശിച്ചു. ഞായർ രാത്രി 12 മണിയോടെയാണ് മിന്നല്‍ ഉണ്ടായത്. വീടുകള്‍ ഭാഗീകമായി നശിച്ച അവസ്ഥയിലാണ്. ആർക്കും പരിക്കില്ല.
പാലായി കുന്ന് അമ്പാട്ട് വീട്ടില്‍ സാറാമ്മയുടെ വീടിന്റെ ഭിത്തിയില്‍ പൊട്ടല്‍ ഉണ്ടാവുകയും കാർ ഷെഡ്ഡിനോട് ചേർന്ന തറ മിന്നലിന്റെ ആഘാതത്തില്‍ ചിതറി തെറിക്കുകയും ചെയ്തു. വീട്ടിലെ വയറിങ്ങും വൈദ്യുതി ഉപകരണങ്ങളും പൂർണമായും കത്തി നശിച്ചു.
പേരക്കുട്ടി അക്ഷരയുടെ കൈകള്‍ക്ക് ചെറുതായി പൊള്ളലേല്‍ക്കുകയും ചെയ്തിട്ടുണ്ട്.
തറയില്‍ നിന്നും ഇളകിത്തെറിച്ച കല്ലും മണ്ണും സമീപവീടിന്റെ മേച്ചിലിന്റെ മുകള്‍ ഭാഗം വരെ തെറിച്ച്‌ വീണു. പോക്കയില്‍ എല്‍ദോ, തെക്കേക്കുറ്റയില്‍ ഫിലിപ്പോസ്, മുരിങ്ങത്തറ ദാസൻ, അറയ്ക്കക്കുടി സിബി, ആനപ്പം തടത്തില്‍ ശിവൻ, കണ്ണാട്ടു മഠം വിനീത, കണ്ണിമോളത്ത് ശശി, അനില്‍കുമാർ, കെ കെ തമ്പി, മഹേഷ്, മനോജ്,എന്നിവരുടെയും കളരിക്കല്‍ അശോകൻ എന്നിവരുടെ വീടുകളിലാണ് നാശനഷ്ടം ഉണ്ടായിട്ടുള്ളത്.
ഫാൻ, എ സി, ഫ്രിഡ്ജ്, ഇൻവർട്ടർ തുടങ്ങി ഗൃഹോപകരണങ്ങള്‍ എല്ലാം കത്തിനശിച്ചു.
