കുമരകം : ഓരോ വീട്ടിലും പച്ചക്കറിത്തോട്ടം ഒരുക്കി കൃഷിയെ ജനകീയമാക്കുകയെന്ന ലക്ഷ്യത്തോടെ കുമരകം ഗ്രാമപഞ്ചായത്ത് മൂന്നാം വാർഡിൽ കുമരകം കൃഷിഭവന്റെ സഹകരണത്തോടെ ‘ഹരിതഗ്രഹം’ പദ്ധതിക്ക് തുടക്കമായി. പദ്ധതിയുടെ ഭാഗമായി സംഘടിപ്പിച്ച പ്രാരംഭ കൃഷി പരിശീലന ക്ലാസ് മൂന്നാം വാർഡിൽ നടന്നു. വാർഡ് മെമ്പർ വി. കെ. സുനിത്തിന്റെ അധ്യക്ഷതയിൽ നടന്ന യോഗം ഗ്രാമപഞ്ചായത്ത് പ്രസിഡന്റ് എ.പി. ഗോപി ഉദ്ഘാടനം ചെയ്തു. കാർഷിക വിജ്ഞാന കേന്ദ്രത്തിലെ അസിസ്റ്റന്റ് പ്രൊഫസർ ഡോ. ആശാ വി.പിള്ള കൃഷി പരിശീലന ക്ലാസ് നയിച്ചു. ആദ്യഘട്ടത്തിൽ 35 പേർക്കാണ് പരിശീലനം നൽകിയത്.
ഗ്രോബാഗ് കൃഷി, പോട്ടിംഗ് മിക്സ് തയ്യാറാക്കൽ, തൈ നടീൽ, ജൈവവളങ്ങളുടെ പ്രയോഗം തുടങ്ങിയ വിഷയങ്ങളിൽ പ്രായോഗിക പരിശീലനം നൽകി. അഗ്രികൾച്ചർ ഓഫീസർ ഡോ. ആൻ സ്നേഹ ബേബി പദ്ധതിയെക്കുറിച്ച് വിശദീകരിച്ചു. ഗ്രാമപഞ്ചായത്ത് അംഗം പി.കെ. സേതു,ആത്മ അസിസ്റ്റന്റ് ടെക്നോളജി മാനേജർ സബിത സി.ടി. എന്നിവർ സംസാരിച്ചു.
പദ്ധതിയുടെ ഭാഗമായി ഗ്രോബാഗുകൾ, പച്ചക്കറി തൈകൾ, പച്ചക്കറി വിത്തുകൾ, എല്ലുപൊടി, വേപ്പിൻപിണ്ണാക്ക് തുടങ്ങിയ ജൈവവളങ്ങൾ ഗുണഭോക്താക്കൾക്ക് വിതരണം ചെയ്തു.
“കൃഷിയെ ഓരോ വീട്ടിലേക്കും എത്തിക്കുകയും ഓരോ കുടുംബത്തെയും പച്ചക്കറി ഉൽപ്പാദനത്തിൽ പങ്കാളികളാക്കുകയുമാണ് പദ്ധതിയുടെ ലക്ഷ്യമെന്ന് വാർഡ് മെമ്പർ വി. കെ. സുനിത്ത് പറഞ്ഞു.
