കോട്ടയം: നാടിനെ നടുക്കിയ കുമരകം ബോട്ട് ദുരന്തത്തിന് ഇന്ന് 24 വർഷം. 2002 ജൂലൈ 27-ന് വേമ്പനാട്ടുകായലിൽ നടന്ന ഈ ദാരുണ അപകടത്തിൽ പിഎസ്സി പരീക്ഷ എഴുതാൻ പോയ ഉദ്യോഗാർത്ഥികൾ, തൊഴിലാളികൾ, ഒരു കുഞ്ഞ് ഉൾപ്പെടെ 29 പേരുടെയാണ് ജീവൻ നഷ്ടമായത്.
മുഹമ്മയിൽ നിന്ന് കുമരകത്തേക്ക് സർവീസ് നടത്തിയിരുന്ന സംസ്ഥാന ജലഗതാഗത വകുപ്പിന്റെ എ-29 യാത്രാബോട്ടാണ് അപകടത്തിൽപ്പെട്ടത്. അനുവദനീയമായതിലും കൂടുതൽ യാത്രക്കാരെ കയറ്റിയതും ബോട്ടിന്റെ ജീർണാവസ്ഥയും അപകടത്തിന് കാരണമായെന്നായിരുന്നു അന്വേഷണത്തിലെ കണ്ടെത്തൽ. യാത്രയ്ക്കിടെ ബോട്ടിന്റെ അടിത്തട്ട് തുളഞ്ഞ് വെള്ളം കയറിയതോടെ നിയന്ത്രണം നഷ്ടപ്പെട്ട ബോട്ട് വേമ്പനാട്ടുകായലിൽ തലകീഴായി മറിയുകയായിരുന്നു.
അപകടം നടന്ന ഉടൻ പ്രദേശവാസികളും മത്സ്യത്തൊഴിലാളികളും രക്ഷാപ്രവർത്തനത്തിന് നേതൃത്വം നൽകി. തുടർന്ന് പോലീസും ഫയർഫോഴ്സും നാവികസേനയുടെ മുങ്ങൽ വിദഗ്ധരും ചേർന്ന് വ്യാപക തിരച്ചിൽ നടത്തി. എന്നാൽ കായലിലെ ശക്തമായ അടിയൊഴുക്കും ആഴവും രക്ഷാപ്രവർത്തനത്തെ സാരമായി ബാധിച്ചു.
