കുമരകം : എല്ലാം വിട്ടെറിഞ്ഞ് ജീവൻ രക്ഷിക്കാനായി നീന്തിക്കയറി ദുരിതാശ്വാസ ക്യാമ്പിൽ കഴിയുന്നവരെ സഹായിക്കാൻ
ഗവൺമെന്റ് വൊക്കേഷണൽ ഹയർ സെക്കൻഡറി സ്കൂളിലെ പിടിഎയും അധ്യാപകരും എത്തി. വെള്ളപ്പൊക്ക ദുരിതാശ്വാസ ക്യാമ്പിൽ കഴിയുന്ന ജനങ്ങളെ സന്ദർശിക്കുകയും അവർക്ക് വേണ്ടുന്ന അവശ്യസാധനങ്ങൾ വിതരണം ചെയ്യുകയും ചെയ്തു.
ക്യാമ്പിൽ രജിസ്റ്റർ ചെയ്ത 85 കുടുംബങ്ങൾക്ക് പേസ്റ്റ്, തോർത്ത്, ബ്രഷ്, എണ്ണ, തുടങ്ങിയവയാണ് വിതരണം ചെയ്തത്. കുമരകത്ത് വിവിധ പ്രദേശങ്ങളിലുള്ള സ്ത്രീകളും പുരുഷന്മാരും കുട്ടികളും അടങ്ങുന്ന വലിയൊരു സമൂഹം തന്നെ സ്കൂളിൽ ക്യാമ്പ് ചെയ്യുന്നുണ്ട്.
കുട്ടികൾക്ക് വേണ്ടുന്ന ക്രയോൺസ് ഡ്രോയിങ് ബുക്കുകൾ കളിക്കുന്നതിനുള്ള സാധനങ്ങൾ തുടങ്ങിയ വസ്തുക്കൾ നൽകുകയും കുട്ടികളുടെ മാനസിക പിരിമുറുക്കം കുറക്കുന്നതിന്റെ ഭാഗമായി സ്കൂൾ കൗൺസിലറുടെ നേതൃത്വത്തിൽ വിവിധ വിനോദങ്ങൾ സംഘടിപ്പിക്കുകയും ചെയ്തു.
പ്രായമായവർക്കും മറ്റുള്ളവർക്കും മാനസിക സന്തോഷം നൽകുന്നതിനായി ടിവി സജ്ജീകരിച്ച് കേബിൾ കണക്ഷൻ സ്ഥാപിച്ചു കൊടുത്തു. സ്കൂൾ പിടിഎ പ്രസിഡന്റ് വി. എസ്.സുഗേഷ്, പ്രിൻസിപ്പൽ ടി.സത്യൻ , കെ. ആർ.സജ്ജയൻ രമ്യ രഘുനാഥ്, ജ്യോതിലാൽ തുടങ്ങിയവർ ക്യാമ്പിൽ സജീവമായിരുന്നു.
