കോട്ടയം: കോട്ടയം ജനറൽ ആശുപത്രിയിൽ കിഫ്ബി ധനസഹായത്തോടെ നിർമ്മിച്ചുവരുന്ന ബഹുനില കെട്ടിടത്തിന്റെ നിർമ്മാണ പ്രവർത്തനങ്ങൾ ഇന്ന് പുനരാരംഭിക്കും. നിയമസഭാ സ്പീക്കർ തിരുവഞ്ചൂർ രാധാകൃഷ്ണന്റെ ഇടപെടലിനെ തുടർന്നാണ് നിർമ്മാണം പുനരാരംഭിക്കാൻ തീരുമാനമായത്.
നിർമ്മാണ പുരോഗതി വിലയിരുത്തുന്നതിനായി സ്പീക്കർ ആശുപത്രി സന്ദർശിച്ച് ആശുപത്രി അധികൃതർ, കിഫ്ബി/നിർവഹണ ഏജൻസി ഉദ്യോഗസ്ഥർ, കരാർ കമ്പനിയായ ജെയിൻ എ ടു സെഡിന്റെ മാനേജിംഗ് ഡയറക്ടർ എന്നിവരുമായി ചർച്ച നടത്തി.
ബിൽ തുക കുടിശികയായതിനെ തുടർന്ന് കഴിഞ്ഞ രണ്ട് ദിവസമായി നിർമ്മാണ പ്രവർത്തനങ്ങൾ നിർത്തിവെച്ചിരിക്കുകയായിരുന്നു. കമ്പനിക്ക് ലഭിക്കാനുള്ള കുടിശിക തുക ലഭ്യമാക്കുന്നതിനായി ധനകാര്യ വകുപ്പുമായി ബന്ധപ്പെട്ട് ആവശ്യമായ നടപടികൾ സ്വീകരിക്കുമെന്ന് സ്പീക്കർ ഉറപ്പുനൽകി.
തടസ്സപ്പെട്ട നിർമ്മാണ പ്രവർത്തനങ്ങൾ ഉടൻ പുനരാരംഭിക്കാനും നിശ്ചിത സമയപരിധിക്കുള്ളിൽ ബഹുനില കെട്ടിടത്തിന്റെ നിർമ്മാണം പൂർത്തിയാക്കാനും സ്പീക്കർ ബന്ധപ്പെട്ട ഉദ്യോഗസ്ഥർക്ക് നിർദേശം നൽകി.
