തിരുവനന്തപുരം: ശബരിമല മണ്ഡല-മകരവിളക്ക് തീര്‍ഥാടനത്തോടനുബന്ധിച്ച്‌ അയ്യപ്പഭക്തര്‍ക്ക് കൂടുതല്‍ സുരക്ഷിതവും സൗകര്യപ്രദവുമായ യാത്ര ഉറപ്പാക്കുന്നതിനായി കെഎസ്‌ആര്‍ടിസി പ്രത്യേക ചാര്‍ട്ടേഡ് ട്രിപ്പ് സൗകര്യങ്ങള്‍ ഒരുക്കിയിട്ടുണ്ടെന്ന് ഗതാഗത മന്ത്രി സി.പി ജോണ്‍.
തിരുവിതാംകൂര്‍ ദേവസ്വം ബോര്‍ഡ് ആസ്ഥാനത്ത് ആരംഭിച്ച 24 മണിക്കൂര്‍ കണ്‍ട്രോള്‍ റൂമിലെ കെഎസ്‌ആര്‍ടിസി ബുക്കിങ് കൗണ്ടറിന്റെ ഉദ്ഘാടനം നിര്‍വഹിക്കുകയായിരുന്നു മന്ത്രി.
വ്യക്തികള്‍ക്കും കുടുംബങ്ങള്‍ക്കും ഭക്തസംഘങ്ങള്‍ക്കും വിവിധ സംഘടനകള്‍ക്കും തങ്ങളുടെ യാത്രാ ആവശ്യങ്ങള്‍ക്കനുസരിച്ച്‌ കെഎസ്‌ആര്‍ടിസി ബസുകള്‍ മുന്‍കൂട്ടി ബുക്ക് ചെയ്ത് യാത്ര ചെയ്യാന്‍ ഈ സംവിധാനം വഴി സാധ്യമാകും. യാത്രക്കാരുടെ എണ്ണം, യാത്ര ആരംഭിക്കുന്ന സ്ഥലം, തീയതി, സമയം, യാത്രയുടെ ദൈര്‍ഘ്യം എന്നിവയുടെ അടിസ്ഥാനത്തില്‍ ചാര്‍ട്ടേഡ് സര്‍വീസുകള്‍ ക്രമീകരിക്കാം.
ഭക്തര്‍ക്ക് സ്വന്തം പ്രദേശത്തുനിന്ന് തന്നെ പമ്പയിലേക്കും തിരിച്ചും നേരിട്ട് യാത്ര ചെയ്യുന്നതിനുള്ള സൗകര്യം ഇതിലൂടെ ലഭ്യമാകുമെന്ന് മന്ത്രി വ്യക്തമാക്കി.
കെഎസ്‌ആര്‍ടിസി ബജറ്റ് ടൂറിസം സെല്‍ മുഖേനയാണ് ചാര്‍ട്ടേഡ് ട്രിപ്പുകള്‍ ക്രമീകരിക്കുന്നതെന്നും ഇതിനായി ഓണ്‍ലൈന്‍ റിസര്‍വേഷന്‍ സൗകര്യം ഏര്‍പ്പെടുത്തിയിട്ടുണ്ടെന്നും അദ്ദേഹം പറഞ്ഞു. വിവിധ ഡിപ്പോകള്‍ക്കും പ്രത്യേക സര്‍വീസ് കേന്ദ്രങ്ങള്‍ക്കും സമീപമുള്ള ക്ഷേത്രങ്ങളെ കേന്ദ്രീകരിച്ച്‌ ആവശ്യാനുസരണം പമ്പയിലേക്ക് പ്രത്യേക സര്‍വീസുകള്‍ നടത്തും.
ഇതിനുപുറമെ തീര്‍ഥാടകര്‍ക്ക് വിശ്രമിക്കുന്നതിനും വിരിവയ്ക്കുന്നതിനുമുള്‍പ്പെടെയുള്ള ക്രമീകരണങ്ങളും കെഎസ്‌ആര്‍ടിസി ഒരുക്കിയിട്ടുള്ളതായി മന്ത്രി സി.പി ജോണ്‍ കൂട്ടിച്ചേര്‍ത്തു.
