തിരുവനന്തപുരം: സംസ്ഥാന പൊതുമേഖലാ ഗതാഗത സ്ഥാപനമായ കെഎസ്‌ആർടിസിയുടെ പ്രവർത്തനം സംബന്ധിച്ച ഞെട്ടിക്കുന്ന കണക്കുകള്‍ പുറത്ത്.
2026 സെപ്റ്റംബർ 14 വരെയുള്ള കണക്കുകള്‍ പ്രകാരം കോർപ്പറേഷന്‍റെ പക്കല്‍ സ്വിഫ്റ്റ് ഉള്‍പ്പെടെ ആകെ 5,755 ബസുകളാണ് ഉള്ളത്. എന്നാല്‍ ഇതില്‍ 665 ബസുകള്‍ വിവിധ അറ്റകുറ്റപ്പണികള്‍ക്കായി കട്ടപ്പുറത്താണെന്ന് വിവരാവകാശ രേഖകള്‍ വ്യക്തമാക്കുന്നു.
അപേക്ഷകനായ മുഹമ്മദ് അഷറഫ് എ എസിന് സ്റ്റേറ്റ് പബ്ലിക് ഇൻഫർമേഷൻ ഓഫീസർ നല്‍കിയ ഔദ്യോഗിക മറുപടിയിലാണ് ഈ വിവരങ്ങളുള്ളത്.
ആകെ ലഭ്യമായ ബസുകളില്‍ ഏറ്റവും കൂടുതല്‍ ഓർഡിനറി വിഭാഗത്തിലാണ്-2,988 എണ്ണം. സി എഫ് റിപ്പയർ, അപകടങ്ങളെ തുടർന്നുള്ള അറ്റകുറ്റപ്പണികള്‍ എന്നിവയ്ക്കായി വിവിധ യൂണിറ്റുകളിലും വർക്ക്ഷോപ്പുകളിലുമായി കിടക്കുന്നത് 665 ബസുകളാണ്.
ഇതില്‍ 281 ഓർഡിനറി ബസുകളും, 58 ജെഎൻഎൻയുആർഎം നോണ്‍-എസി ബസുകളും, 50 ഫാസ്റ്റ് പാസഞ്ചറുകളും ഉള്‍പ്പെടുന്നു. കൂടാതെ ഏഴ് വാഹനങ്ങള്‍ പോലീസ് കസ്റ്റഡിയിലാണ്.
