ചേർത്തല: കെഎസ്‌ആർടിസി ചേർത്തല ഡിപ്പോയില്‍നിന്ന് ബസുകളിലെ ഡീസല്‍ ചോർത്തി വിറ്റ സംഭവത്തില്‍ പൊലീസ് കേസെടുത്തു.
മെക്കാനിക്കല്‍ വിഭാഗത്തില്‍ ജോലി ചെയ്യുന്ന നാല് ജീവനക്കാർക്കെതിരെ ഡിപ്പോ അധികൃതർ നല്‍കിയ പരാതിയിലാണ് അന്വേഷണം ആരംഭിച്ചത്. വ്യാഴാഴ്ച അസിസ്റ്റന്റ് ട്രാൻസ്പോർട്ട് ഓഫീസർ ചേർത്തല പൊലീസ് സ്റ്റേഷനില്‍ രേഖാമൂലം പരാതി നല്‍കിയതിനെത്തുടർന്ന് പൊലീസ് സംഘം ഡിപ്പോയിലെത്തി പ്രാഥമിക വിവരങ്ങള്‍ ശേഖരിച്ചു. കോർപറേഷൻ തലത്തില്‍ പ്രത്യേക അന്വേഷണത്തിനും ഉത്തരവിട്ടിട്ടുണ്ട്.
ഡിപ്പോയില്‍ സർവീസ് നടത്തുന്ന ബസുകള്‍ക്ക് പതിവില്ലാത്തവിധം മൈലേജ് കുറയുന്നതും ഡീസല്‍ അടിക്കുന്നതിന് ആനുപാതികമായി ഓടാത്തതും അധികൃതരെ സംശയത്തിലേക്ക് നയിച്ചു. തുടർന്ന് രഹസ്യനിരീക്ഷണം ശക്തമാക്കിയതോടെയാണ് മോഷണം പുറത്തായത്. എൻജിനീയറിങ് വിഭാഗം ഉദ്യോഗസ്ഥൻ ഡിപ്പോ പരിസരത്ത് അഞ്ച് പെൻ ക്യാമറകള്‍ സ്ഥാപിച്ചിരുന്നു. ഇതിലൂടെ നടത്തിയ നിരീക്ഷണത്തിലാണ് സർവീസ് കഴിഞ്ഞ് പാർക്ക് ചെയ്യുന്ന ബസുകളില്‍നിന്ന് ഡീസല്‍ മോഷ്ടിക്കുന്ന സംഘം കുടുങ്ങിയത്. സംഭവത്തിന്റെ വിശദമായ റിപ്പോർട്ട് കെഎസ്‌ആർടിസി ഉന്നതാധികാരികള്‍ക്ക് കൈമാറിയിട്ടുണ്ട്.
രാത്രിയോടെ ബസുകളുടെ ഡീസല്‍ ടാങ്കുകളില്‍ പൈപ്പിട്ട് ഡീസല്‍ ഊറ്റിയെടുത്ത ശേഷം പുറത്ത് വില്‍പ്പന നടത്തുകയായിരുന്നു രീതി. ഓരോ ദിവസവും പല ബസുകളില്‍നിന്നായി 10 മുതല്‍ 15 ലിറ്റർ വരെ ഡീസലാണ് ഇവർ ചോർത്തിയിരുന്നത്. ഏറെ നാളായി തുടർന്നിരുന്ന മോഷണത്തിലൂടെ ആയിരക്കണക്കിന് ലിറ്റർ ഡീസല്‍ നഷ്ടമായിട്ടുണ്ടെന്നാണ് പ്രാഥമിക വിലയിരുത്തല്‍. കൃത്യമായ കണക്കുകള്‍ക്കും കൂടുതല്‍ ജീവനക്കാർക്ക് പങ്കുണ്ടോ എന്നതുള്‍പ്പെടെയുള്ള കാര്യങ്ങള്‍ കണ്ടെത്തുന്നതിനുമായി പൊലീസും കെഎസ്‌ആർടിസിയും വിശദമായ അന്വേഷണം നടത്തിവരികയാണ്.
