തിരുവനന്തപുരം: കെഎസ്‌ഇബി ചെയർമാൻ സ്ഥാനത്ത് നിന്ന് എം ജി രാജമാണിക്യത്തെ മാറ്റിയത് ടെൻഡറില്ലാതെ സ്വകാര്യ കമ്പനിയില്‍ നിന്ന് 1600 കോടിക്ക് വൈദ്യുതി വാങ്ങുന്നതിനെ എതിര്‍ത്തതോടെയെന്ന് വിവരം.
സ്വകാര്യ കമ്പനി ഇടപാടിന് വഴങ്ങാഞ്ഞതും ഹിമാചലില്‍ നിന്ന് വൈദ്യുതി വാങ്ങുന്നതാണ് നേട്ടമെന്ന നിലപാട് എടുത്തതുമാണ് മാറ്റത്തിന് കാരണമായത്.
കെഎസ്‌ഇബി നിലപാടിനെ പിന്തുണച്ച മന്ത്രി സണ്ണി ജോസഫ് ഹിമാചല്‍ പ്രദേശിന്‍റെ വൈദ്യുതി വാഗ്ദാനത്തിന് 22 ന് മുമ്പ് മറുപടി നല്‍ണമെന്ന് അവശ്യപ്പെട്ടിരുന്നു. അടിയന്തര തീരുമാനത്തിന് കഴിഞ്ഞ 19 ന് കൈമാറിയ ഫയല്‍ വെള്ളിയാഴ്ച വരെ മുഖ്യമന്ത്രിയുടെ പക്കലായിരുന്നു
ഹിമാചല്‍പ്രദേശോ അതോ ജിഎൻഎ എനര്‍ജി പ്രൈവറ്റ് ലിമിറ്റഡോ? ആരില്‍ നിന്ന് വൈദ്യുതി വാങ്ങണം എന്നതിനെ ചൊല്ലി സര്‍ക്കാരിലെ ഉന്നതരും ഊര്‍ജ വകുപ്പും രണ്ടഭിപ്രായത്തില്‍ നില്‍ക്കുന്നതിനിടെയാണ് എം ജി രാജമാണിക്യത്തെ മാറ്റിയത്.
ടെന്‍ഡറില്ലാതെ സ്വകാര്യ കമ്പനിയില്‍ നിന്ന് 5 മാസത്തേയ്ക്ക് വൈദ്യുതി വാങ്ങണമെന്ന നിര്‍ദ്ദേശത്തിന് കെഎസ്‌ഇബി ചെയര്‍മാൻ വഴങ്ങിയില്ല. 500 മെഗാവാട്ടാണ് വാഗ്ദാനം. യൂണിറ്റിന് 8.63 രൂപ എങ്കിലും 1566 കോടിയാകുമെന്നായിരുന്നു കെഎസ്‌ഇബി കണക്ക്.
എന്നാലും പീക്ക് സമയത്തെ കുറവ് നികത്താനാകില്ല. അപ്പോള്‍ തത്സമയ വിപണിയില്‍ നിന്ന് വൈദ്യുതി വാങ്ങാൻ അധിക ചെലവാകും. ഹിമാചല്‍ എങ്കില്‍ പീക്കില്‍ കൂടുതല്‍ കിട്ടും. യൂണിറ്റിന് 14.50 രൂപയെങ്കിലും മാര്‍ച്ച്‌ വരെ 1281 കോടി മാത്രമേ ആവുകയോള്ളൂ. മേയ് വരെ വാഗ്ദാനവുമുണ്ട്. ഒടിസി പ്ലാറ്റ് ഫോം വഴിയുള്ള ഹ്രസ്വകാല കരാറിന് നിയമ പ്രാബല്യമുണ്ടോ കമ്മീഷൻ അംഗീകരിക്കുമോയെന്ന സംശയവും കെഎസ്ബി പ്രകടിപ്പിച്ചു.
ഹിമാചല്‍ ഇടപാടണ് ഗുണകരമെന്ന കെഎസ്‌ഇബി നിലപാട് വൈദ്യുതി മന്ത്രി സണ്ണി ജോസഫ് ഫയലില്‍ എടുത്തു പറഞ്ഞു. കരാര്‍ വ്യവസ്ഥകളെക്കുറിച്ച്‌ പൂര്‍ണമായി അറിയില്ല, എവിടെ നിന്നാണ് വൈദ്യുതിയെന്നറിയില്ല തുടങ്ങിയ അഭിപ്രായങ്ങളെ പിന്തുണച്ചു. ഇക്കാര്യം എഴുതിയാണ് മന്ത്രി കഴിഞ്ഞ 19ന് മുഖ്യമന്ത്രിക്ക് ഫയല്‍ കൈമാറിയത്.
