കോട്ടയം: വേതനം കിട്ടാതായതോടെ കെ.എസ്.ഇ.ബിയിലെ കരാര്‍ തൊഴിലാളികള്‍ പ്രതിസന്ധിയില്‍. ജില്ലയിലെ നൂറുകണക്കിനു തൊഴിലാളികള്‍ക്കാണു കെ.എസ്.
ഇ.ബിയുടെ നീക്കം ഇരുട്ടടിയാകുന്നത്‌. മീറ്റര്‍ റീഡിങ്ങ്‌ മുതല്‍ സര്‍വീസ്‌ കണക്ഷന്‍ നല്‍കുന്നതുള്‍പ്പെടെയുള്ള ജോലികള്‍ ചെയ്യുന്ന പെറ്റി കോണ്‍ട്രാക്‌ടര്‍മാരും തൊഴിലാളികളുമാണ്‌ പ്രതിസന്ധിയിലായത്‌. അഞ്ചു മാസമായി ബില്ലുകള്‍ മാറാത്തതിനെത്തുടര്‍ന്നു കടം വാങ്ങിയും സ്വത്ത്‌ പണയപ്പെടുത്തിയും തൊഴിലാളികള്‍ക്ക്‌ കൂലി നല്‍കേണ്ട അവസ്‌ഥയിലാണു കരാറുകാര്‍.
കെ.എസ്.ഇ.ബി സെക്ഷനുകളില്‍ ഫീല്‍ഡ്‌ സ്‌റ്റാഫുകളുടെ എണ്ണം പരിമിതമാണ്‌. ഒരു സെക്ഷനു കീഴില്‍ 10,000 മുതല്‍ 20,000 വരെ ഉപഭോക്‌താക്കളുണ്ട്‌. ഇവര്‍ക്കുള്ള വിവിധ സേവനങ്ങള്‍ക്കും അറ്റകുറ്റപ്പണികള്‍ക്കും കരാര്‍ തൊഴിലാളികളാണ്‌ ആശ്രയം. ജില്ലയില്‍ 5,569 തൊഴിലാളികളാണ്‌ ഈ മേഖലയില്‍ ജോലി ചെയ്യുന്നത്‌. ഒരു കരാറുകാരന്റെ കീഴില്‍ 10 മുതല്‍ 25 വരെ തൊഴിലാളികള്‍ ദിവസേന പണിയെടുക്കുന്നുണ്ട്‌. ഇവരുടെ വേതനവും മറ്റ്‌ പ്രവര്‍ത്തനച്ചെലവുകളും കരാറുകാരാണു മുന്‍കൂറായി നല്‍കുന്നത്‌.
എന്നാല്‍, അഞ്ചു മാസമായി ബില്ലുകള്‍ മാറാത്തതോടെ പ്രതിസന്ധി രൂക്ഷമായി സാമ്പത്തിക പ്രതിസന്ധിയെ തുടര്‍ന്നു നിരവധി കരാറുകാര്‍ ജോലികള്‍ ഉപേക്ഷിച്ച്‌ രംഗത്തുനിന്നു പിന്മാറി. ഇതോടെ വിവിധ കെ.എസ്.ഇ.ബി സെക്ഷനുകളില്‍ അറ്റകുറ്റപ്പണികളും മറ്റ്‌ ജോലികളും മുടങ്ങുന്ന സ്‌ഥിതിയുണ്ടാകുന്നതായും പരാതിയുണ്ട്‌.
വൈദ്യുതി ലൈനുകളില്‍ സ്‌റ്റേ സ്‌ഥാപിക്കുക, മീറ്റര്‍ റീഡിങ്‌ എടുക്കുക, സര്‍വീസ്‌ കണക്ഷന്‍ നല്‍കുക, സര്‍വീസ്‌ വയര്‍ സ്‌ഥാപിക്കുക തുടങ്ങിയവയാണു പ്രധാന ജോലികള്‍. കെ.എസ്.ഇ.ബിയുമായി ബന്ധപ്പെട്ട ജോലികള്‍ പൂര്‍ത്തിയാക്കിയാല്‍ രണ്ടു മാസത്തിനുള്ളില്‍ ബില്ലുകള്‍ മാറി പണം ലഭിക്കുന്നതായിരുന്നു പതിവ്‌.
ഒക്‌ടോബര്‍ 15ന്‌ മന്ത്രിയുടെ സാന്നിദ്ധ്യത്തില്‍ നടന്ന ചര്‍ച്ചയില്‍ മീറ്റര്‍ റീഡിങ്ങ്‌ ജോലി ചെയ്യുന്ന കരാര്‍ തൊഴിലാളികളുടെ ഒന്‍പത്‌ മാസത്തെ ടി.ഒ.ഡി റീഡിങ്‌ കുടിശിക വേതനം നല്‍കാമെന്നും പെറ്റി കോണ്‍ട്രാക്‌ട് ബില്ലുകള്‍ മാറി നല്‍കാമെന്നും ഉറപ്പുനല്‍കിയിരുന്നു. എന്നാല്‍ ഇതും നടപ്പായില്ല. ലക്ഷങ്ങളാണു പലര്‍ക്കും കുടിശിക. കുടിശിക തുക വിതരണം ചെയ്യുന്നതിനും തൊഴിലാളികള്‍ക്കു കൃത്യമായി വേതനം ലഭിക്കുന്നതിനും അടിയന്തര നടപടി സ്വീകരിച്ചില്ലെങ്കില്‍ സമരപരിപാടികളുമായി മുന്നോട്ടുപോകാനാണു കരാറുകാരുടെ തീരുമാനം.
