പത്തനംതിട്ട: കോഴഞ്ചേരി പുതിയ പാലം നാടിന് സമർപ്പിച്ചു.
എന്നാല്‍ പാലം നിർമ്മാണത്തിന്റെ പിതൃത്വത്തെ ചൊല്ലിയുള്ള രാഷ്ട്രീയ തർക്കത്തെ തുടർന്ന് ഇന്ന് വൈകിട്ട് നാല് മണിക്ക് നടന്ന ഉദ്ഘാടന ചടങ്ങ് എല്‍.ഡി.എഫ് ബഹിഷ്കരിച്ചു.
പാലം ഇടതുപക്ഷം കൊണ്ടുവന്നതാണെന്നും ക്രെഡിറ്റ് അടിച്ചുമാറ്റാൻ ശ്രമിച്ച നടപടി പരിഹാസ്യമാണെന്നും ചൂണ്ടിക്കാട്ടിയാണ് എല്‍.ഡി.എഫ് ആറന്മുള മണ്ഡലം കമ്മിറ്റി ചടങ്ങ് ബഹിഷ്കരിച്ചത്.
കോഴഞ്ചേരി പാലം വേണമെന്ന് നിയമസഭയില്‍ ആവശ്യപ്പെട്ടത് മുൻ എം.എല്‍.എ ശിവദാസൻ നായരാണെന്ന് അബിൻ വർക്കി എം.എല്‍.എ ചടങ്ങില്‍ ആവർത്തിച്ചു. ആദ്യഘട്ടത്തില്‍ പാലത്തിന് അനുവാദം നല്‍കുന്നത് 2013-14 കാലഘട്ടത്തിലാണെന്നും പിന്നീട് വന്ന എല്‍.ഡി.എഫ് സർക്കാർ കൂടുതല്‍ തുക അനുവദിച്ചതായും അദ്ദേഹം പറഞ്ഞു.
വീണാ ജോർജിന്റെ സമയത്താണ് പാലം നിർമ്മാണം ആരംഭിച്ചത്. ഈ പാലം ഏതെങ്കിലും രാഷ്ട്രീയ കക്ഷിയുടേത് മാത്രമല്ലെന്നും ഈ നാടിന്റേതാണെന്നും അബിൻ വർക്കി വ്യക്തമാക്കി.
താൻ തുടങ്ങിവെച്ച നിരവധി കാര്യങ്ങള്‍ ഉദ്ഘാടനം ചെയ്യാൻ അബിൻ വർക്കിക്ക് സാധിക്കുമെന്നും ഇതൊരു തുടക്കം മാത്രമാണെന്നും മുൻ എം.എല്‍.എ ശിവദാസൻ നായർ പ്രതികരിച്ചു. കഴിഞ്ഞ 10 വർഷത്തിന് ശേഷം ഇപ്പോഴാണ് ഒരു സർക്കാർ പരിപാടിയില്‍ ക്ഷണം ലഭിച്ചത്.
ചിലർക്ക് ഒന്നും പറയാതെ വീട്ടിലിരുന്നാലും വാർത്തയില്‍ നിറഞ്ഞുനില്‍ക്കാനുള്ള ഭാഗ്യമുണ്ടെന്നും തനിക്ക് അതുണ്ടെന്നും അദ്ദേഹം പറഞ്ഞു.
