തിരുവനന്തപുരം: കോവളം സ്പാ പീഡനക്കേസില്‍ അന്വേഷണം തമിഴ്‌നാട്ടിലേക്കും വ്യാപിപ്പിക്കുന്നു.
ചെങ്കല്‍പേട്ട് ജില്ലയിലെ ഗുഡുവാഞ്ചേരിയില്‍ വെച്ചും പീഡനം നടന്നതായി ഇര മൊഴി നല്‍കിയതിനെത്തുടർന്നാണ് തമിഴ്‌നാട്ടിലും കേസെടുക്കാനുള്ള നടപടികള്‍ ആരംഭിച്ചത്.
അവിടെയുള്ള സ്പായില്‍ എത്തിച്ചാണ് പീഡനം നടത്തിയതെന്നാണ് മൊഴി. ഏപ്രില്‍, മെയ്, ജൂണ്‍ മാസങ്ങളിലായിരുന്നു പീഡനമെന്നും ഇര വ്യക്തമാക്കിയിട്ടുണ്ട്.
ഇരയുടെ മൊഴിയുടെ അടിസ്ഥാനത്തില്‍ കോവളം പൊലീസ് സ്റ്റേഷനില്‍ സീറോ എഫ്‌ഐആർ രജിസ്റ്റർ ചെയ്തു. കേസുമായി ബന്ധപ്പെട്ട വിവരങ്ങള്‍ തമിഴ്‌നാട് പൊലീസിന് കൈമാറിയിട്ടുണ്ട്.
ഗുഡുവാഞ്ചേരിയില്‍ നടന്നതായി പറയപ്പെടുന്ന സംഭവങ്ങളില്‍ അന്വേഷണം നടത്തണമെന്നും കേരള പൊലീസ് തമിഴ്‌നാട് പൊലീസിനോട് ആവശ്യപ്പെട്ടിട്ടുണ്ട്.
അതേസമയം, കേസുമായി ബന്ധപ്പെട്ട് നഗരസഭയിലെ ഹെല്‍ത്ത് ഇൻസ്‌പെക്ടർക്കെതിരെ വിശദമായ അന്വേഷണം ആരംഭിച്ചു. ഇദ്ദേഹത്തിന്റെ ബാങ്ക് അക്കൗണ്ട് രേഖകളടക്കം പരിശോധിച്ചുവരികയാണ്.
കോവളത്തെ സ്പാ ഹെല്‍ത്ത് ഇൻസ്‌പെക്ടറുടെ ബിനാമി ബിസിനസാണെന്ന നിഗമനത്തിന്റെ അടിസ്ഥാനത്തിലാണ് അന്വേഷണം പുരോഗമിക്കുന്നത്.
