കോട്ടയം: ശബരിമല സീസൺ ആരംഭിക്കാൻ ഇനി ഒരാഴ്ച. കോട്ടയവും സമീപപ്രദേശങ്ങളും വാഹനത്തിരക്കിൽ അമരാൻ പോവുകയാണ്.
തീർത്ഥാടക വാഹനങ്ങൾ കൊണ്ട് വഴിനിറയും. പ്രത്യേകിച്ച് കെ.കെ. റോഡ്. എരുമേലി വഴിയും കാനനപാതയും താണ്ടി ശബരിമലയ്ക്ക് പോകുന്നവർ കെ.കെ. റോഡിലെ ഗതാഗത കുരുക്കിൽ നട്ടംതിരിയാതിരിക്കണമെങ്കിൽ ആവശ്യമായ നിയന്ത്രണങ്ങൾ ഏർപ്പെടുത്തണം.
ഇപ്പോഴത്തെ ഒരു പ്രധാന പ്രശ്നം ഭാരവണ്ടികളുടെ അനിയന്ത്രിതമായ ഓട്ടമാണ്. ഡബിൾ ഭാരം കയറ്റി വരുന്ന ടോറസ് വണ്ടികൾ മറ്റ് വാഹനങ്ങൾക്ക് തടസം സൃഷ്ടിക്കുന്നു എന്ന പരാതി വ്യാപകമാണ്. ഇത്തരം ടോറസ് വണ്ടികൾ ഒരു നിയന്ത്രണവുമില്ലാതെയാണ് ഓടുന്നത്.
മറ്റ് വാഹനങ്ങൾക്ക് സൈഡ് കൊടുക്കാതെയുള്ള ടോറസ് വണ്ടികളുടെ ഓട്ടം ചെറുതൊന്നുമല്ല വാഹനങ്ങളെ വലയ്ക്കുന്നത്. പിന്നിൽ വരുന്നത് ഏതു വാഹനമായാലും സൈഡ് കൊടുക്കാതെ ഓടും. എത്ര ഹോണടിച്ചാലും സൈഡ് കൊടുക്കില്ല.
ഇങ്ങനെ സൈഡ് കൊടുക്കാതെ വരുമ്പോൾ പിന്നിൽ വരുന്ന വാഹനങ്ങളുടെ വലിയ നിര തന്നെ രൂപപ്പെടും. അത്യാവശ്യ കാര്യങ്ങൾക്ക് പോകുന്നവരും രോഗികളുമായി ആശുപത്രിയിലേക്ക് പോകുന്നവരുമൊക്കെ ടോറസിന് പിന്നിൽ ഹോണടിച്ച് എത്ര ശ്രമിച്ചാലും കയറ്റി വിടില്ല. എന്തോ ഒരു വാശിയാണ് ടോറസ് ഡ്രൈവറുടേത്.
തങ്ങൾ റോഡിലെ രാജാക്കൻമാരാണ് എന്ന ഭാവമാണ്.
സാധാരണ ദിവസങ്ങളിൽ ഇതാണ് അനുഭവമെങ്കിൽ ശബരിമല സീസൺ ആരംഭിക്കുമ്പോൾ എന്താകും സ്ഥിതി എന്നാണ് വാഹനം ഓടിക്കുന്നവരുടെ ആശങ്ക.
ശബരിമല സീസൺ കാലത്ത് ഏറെ തിരക്കുള്ള കെ.കെ. റോഡിലെങ്കിലും ടോറസ് നിയന്ത്രണം ആവശ്യമാണ്. ഇല്ലെങ്കിൽ തീർത്ഥാടന വാഹനങ്ങൾക്ക് തടസം നേരിടുക മാത്രമല്ല റോഡിൽ വാക്കേറ്റവും വഴക്കുമൊക്കെ ഉണ്ടാകാൻ സാധ്യതയുണ്ട്.
ഒരു വാഹനത്തെയും കയറ്റിവിടാതെ ഒരു ടോറസ് പോകുമ്പോൾ പിന്നാലെ വരുന്നവർക്ക് ദേഷ്യമുണ്ടാവുക സ്വാഭാവികം. അത് പിന്നെ കൈയ്യാം കളിയിലേക്ക് നീങ്ങാൻ അധിക സമയം വേണ്ട. ഡ്രൈവർമാർ എല്ലാം ഒരേ സ്വഭാവക്കാരല്ലല്ലോ. ചിലർ ക്ഷമിക്കും. മറ്റു ചിലർ ചോദ്യം ചെയ്യും. അത് പിന്നെ വഴക്കിലേക്ക് നീങ്ങും. ഗതാഗത തടസ്സവും ഉണ്ടാകും.
ഇതൊക്കെ പരിഹരിക്കാൻ ടോറസ് ഉൾപ്പെടെയുള്ള വലിയ വാഹനങ്ങൾക്ക് തീർത്ഥാടന കാലത്ത് നിയന്ത്രണങ്ങൾ എർപ്പെടുത്തുകയാണ് വേണ്ടത്.
