കോട്ടയം: കോട്ടയം പെരുവ കുന്നപ്പള്ളിയില്‍ നിർമാണത്തിലിരുന്ന ഫാക്ടറിയില്‍ തീപിടിത്തം.
കമ്പ്യൂട്ടർ ചിപ്പുകളും മദർബോർഡുകളും നിർമിക്കുന്നതിനായി നിർമിച്ചുകൊണ്ടിരുന്ന തലയോലപ്പറമ്പ് സ്വദേശിയുടെ പിസിബി എക്‌സ്‌പ്രസ് എന്ന ഫാക്ടറിയിലാണ് തീപിടിത്തമുണ്ടായത്. ഡിസംബറില്‍ ഉദ്ഘാടനം നടത്താൻ നിശ്ചയിച്ചിരുന്ന ഫാക്ടറിയാണിത്.
ഇന്ന് ഉച്ചയോടെയായിരുന്നു സംഭവം. കഴിഞ്ഞദിവസം ഫാക്ടറിയില്‍ എസി ഘടിപ്പിച്ചിരുന്നു. ഈ എസിയില്‍ നിന്നുള്ള ഷോർട്ട് സർക്യൂട്ടാണ് തീപിടിത്തത്തിന് കാരണമെന്നാണ് പ്രാഥമിക നിഗമനം. ഉടൻ തന്നെ കടുത്തുരുത്തിയില്‍ നിന്നും ഫയർഫോഴ്സ് യൂണിറ്റുകള്‍ എത്തി തീ നിയന്ത്രണവിധേയമാക്കുകയായിരുന്നു.
തീപിടിത്തത്തില്‍ ഫാക്ടറിയുടെ ഒരു ഭാഗം പൂർണമായും കത്തിനശിച്ചു. പുതുതായി എത്തിച്ച വിലകൂടിയ യന്ത്രസാമഗ്രികളും ഉപകരണങ്ങളും കത്തിനശിച്ചതായാണ് വിവരം. അപകടസമയം ഫാക്ടറികള്‍ക്കുള്ളില്‍ ആളുകള്‍ ഇല്ലാതിരുന്നതിനാല്‍ വലിയ ദുരന്തമാണ് ഒഴിവായത്.
