ട്ടയം: മെഡിക്കല്‍ കോളജ്‌ ആശുപത്രിയിലെ പുതിയ സര്‍ജിക്കല്‍ ബ്ലോക്കിലെ നിര്‍മാണപ്പിഴവുകളും ക്രമക്കേടുകളും സംബന്ധിച്ച്‌ വിജിലന്‍സ്‌ അന്വേഷണം ആവശ്യപ്പെടാന്‍ ആശുപത്രി വികസന സൊസൈറ്റി എക്‌സിക്യൂട്ടീവ്‌ കമ്മിറ്റിയില്‍ തീരുമാനം.
ഇതുസംബന്ധിച്ച്‌ ആഭ്യന്തര വകുപ്പിന്‌ കത്തുനല്‍കും. നിര്‍മാണം മുതല്‍ ഉപകരണങ്ങള്‍ സ്‌ഥാപിച്ചതുവരെ അന്വേഷണവിധേയമാക്കണമെന്നാണ്‌ ആവശ്യം.
ഫെബ്രുവരി 16ന്‌ അന്നത്തെ മുഖ്യമന്ത്രി പിണറായി വിജയന്‍ ഉദ്‌ഘാടനം ചെയ്‌ത കെട്ടിടത്തില്‍ സീലിങ്ങും ഭിത്തിയുടെ ഭാഗങ്ങളും അടര്‍ന്നുവീഴുന്നത്‌ പതിവായതോടെയാണ്‌ അന്വേഷണം ആവശ്യപ്പെട്ട്‌ എച്ച്‌.ഡി.എസ്‌ രംഗത്തെത്തിയത്‌. കഴിഞ്ഞ 28ന്‌ ഭൂഗര്‍ഭനിലയിലെ ശൗചാലയ മുറിയില്‍ സീലിങ്ങും കെട്ടിടഭാഗങ്ങളും ഇടിഞ്ഞുവീണപ്പോള്‍ അവിടെയെത്തിയ ജീവനക്കാരി തലനാരിഴയ്‌ക്കാണു രക്ഷപ്പെട്ടത്‌.
ഏപ്രിലില്‍ കെട്ടിടത്തിന്റെ മുകള്‍ ഭാഗത്തുനിന്ന്‌ സിമന്റ്‌ കഷണങ്ങള്‍ അടര്‍ന്നുവീണു പാര്‍ക്ക്‌ ചെയ്‌തിരുന്ന ഡോക്‌ടറുടെ കാര്‍ തകര്‍ന്നു. അടുത്തിടെ നേത്രവിഭാഗത്തിലെ സീലിങ്ങ്‌ അടര്‍ന്നുവീണ്‌ രോഗികള്‍ തലനാരിഴയ്‌ക്കാണ്‌ രക്ഷപ്പെട്ടത്‌.
ചോര്‍ച്ച, ഫാന്‍ ലീഫ്‌ ഇളകിവീഴല്‍, ഷോര്‍ട്ട്‌ സര്‍ക്യൂട്ട്‌ എന്നിവ പതിവാണ്‌. ദിനംപ്രതി ആയിരക്കണക്കിനു രോഗികളെത്തുന്ന ആശുപത്രിയില്‍ അപകടങ്ങള്‍ ആവര്‍ത്തിക്കുന്നത്‌ ആശങ്കയ്‌ക്കിടയാക്കി. വിഷയം നാട്ടകം സുരേഷ്‌ എം.എല്‍.എ നിയമസഭയില്‍ ഉന്നയിച്ചതിനെത്തുടര്‍ന്ന്‌ മന്ത്രി കെ.മുരളീധരന്‍ അന്വേഷണത്തിനു നിര്‍ദേശം നല്‍കി.
നിര്‍മാണച്ചുമതലയുണ്ടായിരുന്ന കമ്പനിയെ കരിമ്പട്ടികയില്‍പ്പെടുത്തണമെന്നും അഴിമതി, സാങ്കേതിക വീഴ്‌ചകള്‍ എന്നിവ പരിശോധിക്കാന്‍ വിദഗ്‌ധസമിതിയെ നിയോഗിച്ച്‌ സമഗ്ര അന്വേഷണം നടത്തണമെന്നും നാട്ടകം സുരേഷ്‌ എം.എല്‍.എ ആവശ്യപ്പെട്ടു.
