എറ്റുമാനൂര്: ലക്ഷങ്ങള് ചെലവഴിച്ചു നിര്മിച്ച ഏറ്റുമാനൂര് -അതിരമ്പുഴ റോഡിലെ കാത്തിരിപ്പു കേന്ദ്രം നോക്കുകുത്തിയായി മാറുന്നു. ഇവിടെ ബസ് നിര്ത്താറില്ല എന്നാതാണു പ്രധാന പ്രശ്നം. ഇവിടെ യാത്രക്കാര് കാത്തു നില്ക്കാറില്ല.
രാത്രിയും പകലും സാമൂഹികവിരുദ്ധര് കാത്തിരിപ്പു കേന്ദ്രം കൈയ്യടക്കിയിരിക്കുകയാണ്. മദ്യകുപ്പികള് കൊണ്ടു നിറഞ്ഞിരിക്കുന്ന ഇവിടെ തെരുവു നായ്ക്കളുടെ ശല്യവും ഉണ്ട്. ജില്ലാ പഞ്ചായത്തംഗം ജോസ് മോന് മുണ്ടക്കല് ഡിവിഷന് മെമ്പര് ആയിരുന്ന സമയത്തു നിര്മ്മിച്ചതാണ് ഈ കാത്തിരിപ്പ് കേന്ദ്രം.
റോഡ് പണി പൂര്ത്തിയാകുമ്പോള് കുരിശുപള്ളി ജങ്ഷനിലെ ബസ് സ്റ്റോപ്പ് ഇങ്ങോട്ട് മാറ്റാനായിരുന്നു പദ്ധതി. നഗരത്തിലെ ഗതാഗത കുരുക്കിനും പരിഹാരമാകും എന്നു കരുതിയിരുന്നു. എന്നാല്, റോഡ് നവീകരണം കഴിഞ്ഞിട്ടും വിലക്കുകള് ലംഘിച്ചു ബസ് ഇപ്പോഴും കുരിശുപള്ളി ജങ്ഷനിലാണു നിര്ത്തുന്നത്.
ജനങ്ങള്ക്കുണ്ടാകുന്ന ഈ ബുദ്ധിമുട്ട് പരിഹരിക്കാന് നടപടി എടുക്കണം എന്നാണു യാത്രക്കാരുടെ ആവശ്യം. ടൈലുകള് പാകി യാത്രക്കാര്ക്ക് ഇരിക്കാനുള്ള ബഞ്ചും ഉള്ള ഈ കാത്തിരിപ്പ് കേന്ദ്രം ഉപയോഗപ്രദമാക്കിയാല് ഏറ്റുമാനൂരിലെ കടുത്ത ഗതാഗതകുരുക്കിന് ഒരു പരിധിവരെ പരിഹാരമാകും.
