കോട്ടയം: കോട്ടയം നഗരത്തിന്റെ സമഗ്ര വികസനം ലക്ഷ്യമിട്ട് നഗരസഭ തയാറാക്കിയ മാസ്റ്റർപ്ലാൻ നിർദേശങ്ങൾക്കു കൗൺസിൽ അംഗീകാരം നൽകി.
നഗരസഭയുടെ കേന്ദ്ര ഓഫീസ് നാഗമ്പടത്തേക്ക് മാറ്റുന്നതുൾപ്പെടെ വികസന പദ്ധതികളാണ് മാസ്റ്റർപ്ലാനിൽ ഉൾപ്പെടുത്തിയിരിക്കുന്നത്.
നെഹ്റു പാർക്കിന് എതിര്വശം ഇൻഡോർ സ്റ്റേഡിയത്തോടു ചേർന്നുള്ള നിലവിലെ ലോറി പാർക്കിംഗ് സ്ഥലത്താണ് പുതിയ നഗരസഭാ ആസ്ഥാന മന്ദിരം നിർമിക്കുന്നത്. ഭാവിയിൽ നഗരസഭ കോർപറേഷനായി ഉയർത്തിയാലും പ്രയോജനപ്പെടുത്താനു കഴിയുന്ന വിധത്തിൽ ആദ്യഘട്ടത്തിൽ മൂന്നുനില കെട്ടിടമാണ് നിർമിക്കുന്നത്.
പാർക്കിംഗ് സൗകര്യം, കൗൺസിൽ ഹാൾ, ഓഡിറ്റോറിയം, സ്ഥിരംസമിതി അധ്യക്ഷന്മാരുടെ ഓഫീസുകൾ, സന്ദർശക ഗാലറി എന്നിവയും ഇ-ഫയലിംഗ് സംവിധാനവും പുതിയ സമുച്ചയത്തിലുണ്ടാകും. കുമാരനല്ലൂർ, നാട്ടകം മേഖലാ ഓഫീസുകൾക്കും പുതിയ ബഹുനില കെട്ടിടങ്ങൾ നിർമിക്കുന്നുണ്ട്.
കേന്ദ്ര നഗരകാര്യമന്ത്രാലയത്തിന്റെ സഹായത്തോടെയാണ് പ്രധാന വികസന പ്രവർത്തനങ്ങൾ നടപ്പാക്കാൻ ലക്ഷ്യമിടുന്നത്. പദ്ധതിച്ചെലവിന്റെ 25 ശതമാനം കേന്ദ്രസർക്കാർ വഹിക്കും. ബാക്കി തുക സർക്കാർ ഗ്രാന്റുകൾ, പൊതുസ്വകാര്യ പങ്കാളിത്തം, സിഎസ്‌ആർ ഫണ്ടുകൾ എന്നിവയിലൂടെ കണ്ടെത്താനാണ് നഗരസഭയുടെ നീക്കം.
