കോട്ടയം: കോട്ടയത്ത് പെട്ടിക്കട കച്ചവടം കൊഴുക്കുന്നു. ഫുട്പാത്തിലും റോഡരികിലും അനധികൃത പെട്ടിക്കടകളും ബങ്കും ബജിക്കടകളും സ്ഥാപിച്ച് മറിച്ച് വിൽപ്പന നടത്തുന്ന സംഘമാണ് ഇതിന് പിന്നിൽ.
കോട്ടയം നഗരം കേന്ദ്രമാക്കി പ്രവർത്തിക്കുന്ന ഈ സംഘത്തിന് ഉന്നതങ്ങളിൽ നല്ല പിടിപാടുണ്ട്. ഈ കടകളിൽ കഞ്ചാവും മദ്യവും സുലഭമാണ്. നഗരത്തിൽ ഇവർ സൗകര്യപ്രദമായ സ്ഥലം നോക്കി പെട്ടിക്കട സ്ഥാപിക്കും. അത് പിന്നീട് ബജിക്കടയായി മാറും. ഒരു മാസത്തിനുളളിൽ അത് മറിച്ചു വിൽക്കും. ഒന്നോ രണ്ടോ ലക്ഷത്തിനാണ് കച്ചവടം ഉറപ്പിക്കുന്നത്. അതല്ലെങ്കിൽ ദിവസ വാടകയ്ക്ക് നൽകും. ദിവസം 500 മുതൽ 1000 രൂപ വരെയാണ് വാടക.
ഇങ്ങനെ കോട്ടയം നഗരത്തിന്റെ പല ഭാഗങ്ങളിലും അനധികൃത പെട്ടിക്കടകൾ വാടകയ്ക്ക് നൽകി ലക്ഷങ്ങൾ സമ്പാദിക്കുന്നവർ കോട്ടയത്തുണ്ട്. സർക്കാരിന്റെ സ്ഥലം വാടകയ്ക്ക് കൊടുത്ത് പണം സമ്പാദിച്ച് തടിച്ചു കൊഴുക്കുന്നത് ചില ലോക്കൽ രാഷ്ട്രീയക്കാരുടെ തണലിലാണ്. റോഡും പുറമ്പോക്കുമൊക്കെ ഇവർ കൈയ്യേറി കടയുണ്ടാക്കും പിന്നീട് ലക്ഷങ്ങൾക്ക് മറിച്ച് വിൽക്കും.
വർഷങ്ങളായി തുടരുന്ന അനീതിയാണിത്. ഇത് മൂലം ബുദ്ധിമുട്ടുന്നത് ലക്ഷങ്ങൾ പകിടിയും വാടകയും നൽകി ലൈസൻസുമെടുത്ത് വ്യാപാരം ചെയ്യുന്നവരാണ്.
സിഎംഎസ് കോളജിന് സമീപം ചാലുകുന്ന് റോഡ് സൈഡിൽ ഫയർഫോഴ്സിന് വെള്ളം സംഭരിക്കുന്ന ഒരു ടാങ്കുണ്ട്. പുറമെ കോൺക്രീറ്റ് ചെയ്ത ടാങ്കിന് മുകൾവശം ഇപ്പോൾ ലക്ഷങ്ങൾ കച്ചവടം നടത്തുന്ന ഒരു ബജിക്കടയാണ്. ഇതും ഒരാൾ വാടകയ്ക്ക് നൽകിയിരിക്കുകയാണ്. അതായത് ഈ ടാങ്കിന് മുകളിൽ ആദ്യം ഒരു തട്ടുകടയാണ് തുടങ്ങിയത്. അത് പിന്നീട് ദിവസ വാടകയ്ക്ക് മറിച്ചു കൊടുത്തു. ദിവസം 1000 രൂപയാണ് ഇപ്പോൾ വാടക. ഇതുപോലെ സർക്കാരിന്റെ സ്ഥലം കൈയേറി വാടകയ്ക്ക് നൽകി ലക്ഷങ്ങൾ സമ്പാദിക്കുന്ന ഒരു സംഘം കോട്ടയം കേന്ദ്രമാക്കി പ്രവർത്തിക്കുന്നു. ഇവരെ തൊടാൻ ഇന്നു വരെ ആർക്കും കഴിഞ്ഞിട്ടില്ല .
പൊതുജനങ്ങൾക്ക് വഴി നടക്കാനോ, ഡ്രൈവർമാർക്ക് വാഹനമോടിക്കാനോ കഴിയാത്തവിധം നാഗമ്പടം, ശാസ്ത്രീ റോഡ്, ടി ബി റോഡ്, നാഗമ്പടം പാലത്തിന് സമീപം, കുര്യൻ ഉതുപ്പ് റോഡ്, കല്യാൺ സിൽക്സിന് സമീപം, റെയിൽവേ സ്റ്റേഷൻ, എം എൽ റോഡ്, ചാലുകുന്ന് എന്ന് വേണ്ട സകല ജംഗ്ഷനിലും അനധികൃത പെട്ടിക്കടകളാണ്.





