കോട്ടയം : മദ്യപിച്ചെത്തി ഉണ്ടായ തർക്കത്തിന് പിന്നാലെ കോട്ടയം സ്വദേശിയായ യുവാവ് സൗദി അറേബ്യയില് കുത്തേറ്റു മരിച്ചു. കോട്ടയം വില്ലൂന്നി പനച്ചിക്കല് വീട്ടില് 48കാരനായ അനൂപ് ചാക്കോ ആണ് കൊല്ലപ്പെട്ടത്. സംഭവവുമായി ബന്ധപ്പെട്ട് തൃശൂർ സ്വദേശിയായ യുവാവിനെ സൗദി പൊലീസ് കസ്റ്റഡിയിലെടുത്തിട്ടുണ്ട്.
മദ്യപിച്ചെത്തിയ തൃശൂർ സ്വദേശിയുമായി അനൂപ് ചാക്കോയ്ക്ക് തർക്കമുണ്ടാവുകയും ഇത് കൊലപാതകത്തില് കലാശിക്കുകയുമായിരുന്നു എന്നാണ് നാട്ടില് ബന്ധുക്കള്ക്ക് ലഭിച്ച പ്രാഥമിക വിവരം. കസ്റ്റഡിയിലുള്ള കുറ്റാരോപിതനെ പൊലീസ് ചോദ്യം ചെയ്തു വരികയാണ്. കൊലപാതകത്തിലേക്ക് നയിച്ച കൃത്യമായ കാരണങ്ങള് സൗദി പൊലീസിൻ്റെ അന്വേഷണത്തിന് ശേഷം മാത്രമേ വ്യക്തമാകുകയുള്ളൂ.
കൊല്ലപ്പെട്ട അനൂപിന്റെ മൃതദേഹം സൗദിയില് പോസ്റ്റ്മോർട്ടം ഉള്പ്പടെയുള്ള നിയമനടപടികള് പൂർത്തിയാക്കിയ ശേഷം ഇന്ത്യൻ എംബസിയുടെയും പ്രവാസി സംഘടനകളുടെയും നേതൃത്വത്തില് നാട്ടിലെത്തിക്കും.
