തോടുപുഴ: കോട്ടയം, തൊടുപുഴ റേഞ്ചുകളില്‍ കേരള ഫോറസ്ട്രി പ്രോജക്ടിന്റെ ഭാഗമായി നടപ്പിലാക്കിയ വനവല്‍ക്കരണ പദ്ധതികളില്‍ സർക്കാർ ഫണ്ട് വകമാറ്റി ചെലവഴിച്ചെന്ന കേസില്‍ വിരമിച്ച ഐ.എഫ്.എസ് ഉദ്യോഗസ്ഥർക്കെതിരേയുള്ള പ്രോസിക്യൂഷൻ അനുമതി അപേക്ഷ സർക്കാർ തള്ളി.
മുൻ ഐ.എഫ്.എസ് ഉദ്യോഗസ്ഥരായ എൻ.ശശിധരൻ, ഡോ. അമിത് മല്ലിക് എന്നിവർക്കെതിരേ പ്രോസിക്യൂഷൻ അനുമതി നല്‍കുന്നതാണ് സർക്കാർ തടഞ്ഞത്. പ്രിവൻഷൻ ഓഫ് കറപ്ഷൻ ആക്‌ട് 1988 ലെ സെക്ഷൻ 19 പ്രകാരമുള്ള പ്രോസിക്യൂഷൻ അനുമതിയാണ് ചീഫ് സെക്രട്ടറി ബിശ്വനാഥ് സിൻഹ പുറത്തിറക്കിയ ഉത്തരവിലൂടെ നിരസിച്ചത്. 26 വർഷം പഴക്കമുള്ള അഴിമതിക്കേസിലാണ് സർക്കാരിന്റെ നിർണായക തീരുമാനം.1998 -99, 1999 -2000 കാലയളവില്‍ തൊടുപുഴ റേഞ്ചില്‍ വിവിധ വനവല്‍ക്കരണ പദ്ധതികള്‍ക്കായി അനുവദിച്ച ഫണ്ടുകള്‍ വകമാറ്റി ചെലവഴിച്ചെന്നാരോപിച്ചാണ് വിജിലൻസ് കേസ് രജിസ്റ്റർ ചെയ്തത്.
ആരോപണങ്ങള്‍ തെളിയിക്കുന്നതില്‍ പ്രോസിക്യൂഷൻ പരാജയപ്പെട്ടെന്നാണ് സർക്കാർ വിശദീകരണം. പദ്ധതി പ്രദേശങ്ങളില്‍ വനവല്‍കരണ പ്രവർത്തനങ്ങള്‍ യഥാർത്ഥത്തില്‍ നടന്നിട്ടില്ലെന്ന് വിശ്വസനീയമായ തെളിവുകളോടെ സ്ഥാപിക്കാൻ അന്വേഷണ ഏജൻസിക്ക് കഴിഞ്ഞിട്ടില്ല. കോതമംഗലം ഡി.എഫ്.ഒ ആയി ചെറിയ കാലയളവില്‍ (രണ്ട് മാസത്തോളം) മാത്രം സേവനമനുഷ്ഠിച്ച വ്യക്തിയാണ് ഡോ.അമിത് മല്ലിക്. സർക്കാർ ഉത്തരവുകളുടെ അടിസ്ഥാനത്തില്‍ ബില്ലുകള്‍ മാറിക്കൊടുത്തതില്‍ നിയമവിരുദ്ധതയില്ലെന്ന് വ്യക്തമായിട്ടുണ്ടെന്ന് ചീഫ് സെക്രട്ടറി വ്യക്തമാക്കുന്നു. കോട്ടയം മുൻ ഡി.എഫ്.ഒ ആയ എൻ.ശശിധരന്റെ കാര്യത്തില്‍, യഥാർത്ഥ പദ്ധതി പ്രദേശങ്ങളുടെ വ്യാപ്തിയോ കൃത്യമായ സാമ്പത്തിക നഷ്ടമോ സ്ഥിരീകരിക്കാൻ അന്വേഷണത്തിന് സാധിച്ചിട്ടില്ല. മുൻകാലങ്ങളില്‍ റീസർവേ നടത്തി അധികമായി നല്‍കിയ തുക പിന്നീട് വന്ന ബില്ലുകളില്‍ നിന്ന് ക്രമീകരിച്ച്‌ തിരുത്തല്‍ നടപടികള്‍ സ്വീകരിച്ചിരുന്നു. വിജിലൻസിന്റെയും ഇടുക്കി ഫ്ളൈയിങ് സ്ക്വാഡിന്റെയും കണ്ടെത്തലുകള്‍ പരസ്പരവിരുദ്ധവും കൃത്യമായ തെളിവുകളുടെ അടിസ്ഥാനത്തിലല്ലാത്തതുമാണെന്ന് സർക്കാർ ചൂണ്ടിക്കാട്ടുന്നു.
