കോട്ടയം: മലയാളി അസോസിയേഷന്റെ ഓണാഘോഷത്തിൽ കളിച്ചുചിരിച്ച് ഒന്നിച്ച് ആഘോഷിച്ചവരാണ്. പെട്ടെന്ന് എന്തുപറ്റി എന്നറിയില്ല. ആകെ ഷോക്കായി ഇരിക്കുവാണ്’–യുഎസിൽ സുഹൃത്തായ യുവതി കൊലപ്പെടുത്തിയ തൃശൂർ സ്വദേശിനി അഞ്ജനയുടെ അടുത്ത ബന്ധു പറയുന്നു.
അഞ്ജനയെയും തിരുവനന്തപുരം സ്വദേശിനി ആൻ മേരി മാത്യുവിനെയും സുഹൃത്തായ മറ്റൊരു മലയാളി യുവതി അനില കൊലപ്പെടുത്തിയെന്ന വിവരം ഇന്നലെയാണ് നാട്ടിലെ ബന്ധുക്കൾക്ക് ലഭിച്ചത്. അഞ്ജനയും ആനും അനിലയും ഉറ്റസുഹൃത്തുക്കളായിരുന്നു.
കൊലപാതക കാരണം എന്താണെന്നറിയില്ല. അനിലയുടെ വീടോ മറ്റ് വിവരങ്ങളോ ഞങ്ങൾക്കും കൃത്യമായി അറിയില്ല. കഴിഞ്ഞ അഞ്ച് വർഷത്തോളമായി മൂന്നുപേരും അടുത്ത സുഹൃത്തുക്കളാണെന്നു മാത്രം അറിയാം.
അഞ്ജന ആറുവർഷമായി കുടുംബത്തോടെ കാലിഫോർണിയയിലാണ്. അധ്യാപികയായാണ് ജോലി ചെയ്യുന്നത്. ഭർത്താവ് വിജീഷ് സോഫ്റ്റ്വെയർ എൻജിനീയറാണ്. മകൾ വാമികയ്ക്ക് ആറുവയസുണ്ട്. വിവരം അറിഞ്ഞതോടെ നോർക്കയുമായി ബന്ധപ്പെട്ടിരുന്നു.
അവർ യുഎസ് എംബസിയുമായി സംസാരിക്കുന്നുണ്ട് എന്നാണ് പറഞ്ഞത്. നോർക്ക സിഇഒയ്ക്ക് മെയിൽ അയച്ചിട്ടുണ്ട്. ഒരു കെട്ടിടത്തിലെ വിവിധ ഫ്ലാറ്റുകളിലായിരുന്നു മൂന്നുപേരും താമസിച്ചിരുന്നത്.
ചിങ്ങവനം സ്വദേശിയെ ഫ്ലാറ്റിലെ മുറിയിൽ വച്ചാണ് കൊലപ്പെടുത്തിയത്. മിൽപിറ്റാസ് പൊലീസ് വ്യക്തമാക്കുന്നത് അനുസരിച്ച് മിൽ ക്രീക് അപാര്ട്മെന്റിന്റെ പാർക്കിംഗ് ഏരിയയിൽ വച്ചാണ് അഞ്ജന കൊല്ലപ്പെട്ടത്.
രണ്ടുദിവസം മുൻപ് ഓണാഘോഷങ്ങളിൽ വലിയ സന്തോഷത്തോടെ മൂന്നുപേരും പങ്കെടുത്തിരുന്നു. അതിനുശേഷം സിനിമയ്ക്ക് പോയെന്നും പറഞ്ഞിരുന്നു. ഒറ്റ ദിവസം കൊണ്ട് എന്താണുണ്ടായതെന്ന് അറിയില്ല.
