ചെന്നൈ: ഉറക്കഗുളിക നല്കി മയക്കിയ ശേഷം ദേഹത്ത് പെട്രോളൊഴിച്ച് സബ് ഇൻസ്പെക്ടറെ ഭാര്യ തീകൊളുത്തിക്കൊന്നു. ചെന്നൈയില് സായുധസേനയില് സബ് ഇൻസ്പെക്ടറായ രാജ് (58) ക്രൂരമായി കൊല്ലപ്പെട്ട സംഭവത്തില് ഭാര്യയും കന്യാകുമാരി സ്വദേശിനിയുമായ സെല്വറാണി (32) പൊലീസിന്റെ പിടിയിലായത്.
പോക്സോ കേസിന്റെ മാനസിക സമ്മർദത്തില് ജീവനൊടുക്കിയതാണെന്ന ഭാര്യയുടെ കള്ളക്കഥ പൊളിച്ചടുക്കിയാണ് നുംഗംപാക്കം പൊലീസ് കൊലപാതകത്തിന്റെ ചുരുളഴിച്ചത്.
കഴിഞ്ഞ ദിവസം രാജ് സെല്വറാണിയോടൊപ്പം പുറത്തുപോയി വസ്ത്രങ്ങള് വാങ്ങി വന്ന് ഭക്ഷണം കഴിച്ച് ഉറങ്ങാൻ കിടന്നതായിരുന്നു. ഇതിനിടയിലാണ് പരിചയക്കാരനായ ദേവൻ എന്നയാളുടെ സഹായത്തോടെ സെല്വറാണി ഈ കൊലപാതകം ആസൂത്രണം ചെയ്ത് നടപ്പാക്കിയത്. രാത്രി രാജിന്റെ മുറിയില്നിന്ന് പുക വമിക്കുന്നത് കണ്ട് നോക്കിയപ്പോഴാണ് കത്തിക്കരിഞ്ഞ നിലയില് മൃതദേഹം കണ്ടെത്തിയത്. തുടർന്ന് നടത്തിയ ഫൊറൻസിക് പരിശോധനയില് ശരീരത്തില് പെട്രോളിന്റെ അംശം കണ്ടെത്തിയത് പൊലീസില് സംശയമുണർത്തി.
ഭാര്യയോട് കാര്യം തിരക്കിയപ്പോള് രാജ് അടുത്തിടെ ഒരു പോക്സോ കേസില് ഉള്പ്പെട്ടിരുന്നെന്നും അതിന്റെ മാനസിക സമ്മർദത്തില് ജീവനൊടുക്കിയതാണെന്നുമായിരുന്നു സെല്വറാണിയുടെ മറുപടി. എന്നാല് അയല്വാസികളോട് സംസാരിച്ചപ്പോഴാണ് ദമ്പതികള് തമ്മില് സ്ഥിരമായി വഴക്കിടാറുണ്ടായിരുന്ന വിവരം പൊലീസ് അറിയുന്നത്. തുടർന്ന് നടത്തിയ ശക്തമായ ചോദ്യംചെയ്യലിലാണ് സെല്വറാണി കുറ്റം സമ്മതിച്ചത്. കൊലപാതകം നടന്ന സമയത്ത് വീടിനു സമീപം ബൈക്കില് ചുറ്റിത്തിരിയുന്ന ഒരാളുടെ സി.സി.ടി.വി ദൃശ്യങ്ങള് ലഭിച്ചതാണ് കേസില് നിർണായകമായത്. ഒളിവില് കഴിയുന്ന ദേവനുവേണ്ടിയുള്ള തീവ്ര തിരച്ചിലിലാണ് പൊലീസ് ഇപ്പോള്
