ബംഗളൂരു: തൊഴിലുടമയുടെ മകളെ പ്രണയിച്ചതിന്റെ പേരില്‍ മലയാളി യുവാവിനെ തല്ലിക്കൊന്നു. പാലക്കാട് തിരുവേഗപ്പുറ സ്വദേശി കിരണ്‍ (22) ആണ് ക്രൂരമായി കൊല്ലപ്പെട്ടത്.
സംഭവവുമായി ബന്ധപ്പെട്ട് യെലഹങ്കയില്‍ സ്വീറ്റ് കോണ്‍ നിർമാണ യന്ത്രങ്ങള്‍ ഉണ്ടാക്കുന്ന ഫാക്ടറി ഉടമയും തമിഴ്‌നാട് സ്വദേശിയുമായ ആനന്ദിനെ പോലീസ് കസ്റ്റഡിയിലെടുത്തു.
യെലഹങ്ക പോലീസ് സ്റ്റേഷൻ പരിധിയിലാണ് സംഭവം നടന്നത്. കഴിഞ്ഞ രണ്ടു വർഷമായി ആനന്ദിന്റെ സ്ഥാപനത്തില്‍ ജോലി ചെയ്തുവരികയായിരുന്ന കിരണ്‍, അദ്ദേഹത്തിന്റെ 19 വയസ്സുള്ള മകളുമായി പ്രണയത്തിലായിരുന്നു. എന്നാല്‍ ഈ ബന്ധത്തെ ആനന്ദ് ശക്തമായി എതിർത്തിരുന്നു. സംഭവദിവസം രാവിലെ തമിഴ്‌നാട്ടിലേക്ക് പോകുകയാണെന്ന് പറഞ്ഞ് ആനന്ദും ഭാര്യയും വീട്ടില്‍നിന്നിറങ്ങിയതോടെ കിരണ്‍ അവിടെയെത്തുകയായിരുന്നു.
എന്നാല്‍ അപ്രതീക്ഷിതമായി തിരിച്ചെത്തിയ ആനന്ദ്, മകള്‍ക്കൊപ്പം കിരണിനെ കണ്ട് പ്രകോപിതനായി. തുടർന്ന് മകളെ ബന്ധുവീട്ടിലേക്ക് മാറ്റിയ ശേഷം, വീട്ടിലുണ്ടായിരുന്ന ക്രിക്കറ്റ് ബാറ്റും പൈപ്പും ഉപയോഗിച്ച്‌ കിരണിനെ ക്രൂരമായി മർദിക്കുകയായിരുന്നു. അവശനായി ബോധംകെട്ട കിരണിനെ ആനന്ദ് തന്നെയാണ് ആശുപത്രിയിലെത്തിച്ചത്. യുവാവ് മരിച്ചതായി സ്ഥിരീകരിച്ച ആശുപത്രി അധികൃതർ വിവരമറിയിച്ചതിനെത്തുടർന്ന് എത്തിയ പോലീസ്, അവിടെയുണ്ടായിരുന്ന ആനന്ദിനെ കസ്റ്റഡിയിലെടുത്തു. പോസ്റ്റ്‌മോർട്ടത്തിനായി മൃതദേഹം ആശുപത്രിയില്‍ സൂക്ഷിച്ചിരിക്കുകയാണ്.
