കോട്ടയം: കോടികള്‍ മുടക്കി നിർമ്മിച്ച കോടിമതയിലെ ആധുനിക മത്സ്യമാർക്കറ്റ് കാടു കയറി വളർന്നിട്ടും തിരിഞ്ഞുനോക്കാതെ അധികൃർ.
മത്സ്യവ്യാപാരികള്‍ക്കായി നിർമിച്ച മത്സ്യമാർക്കറ്റ് കെട്ടിടം വർഷങ്ങളായി അടഞ്ഞുകിടക്കുമ്പോള്‍, ചോർന്നൊലിക്കുന്ന ടാർപ്പായയ്ക്ക് കീഴില്‍ ദുരിതപൂർണമായി വ്യാപാരം തുടരുകയാണ്. കെട്ടിടം ഉപയോഗശൂന്യമായി നശിക്കുമ്പോഴാണ് പച്ചമത്സ്യവും ഉണക്കമത്സ്യവും വില്‍ക്കുന്നവർ റോഡരികിലും താത്ക്കാലിക ഷെഡ്ഡുകളിലുമായി കഴിയുന്നത്. മത്സ്യവ്യാപാരികളെ പുതിയ കെ‌ട്ടിടത്തിലേക്ക് മാറ്റുന്നതിനായാണ് എം.ജി റോഡില്‍ കോടിമതയില്‍ ആധുനിക മത്സ്യമാർക്കറ്റ് നിർമിച്ചത്. എന്നാല്‍, നിർമാണം പൂർത്തിയാക്കി വർഷങ്ങള്‍ പിന്നിട്ടിട്ടും കെട്ടിടത്തില്‍ വ്യാപാരം ആരംഭിക്കാനായിട്ടില്ല.
ഫിഷറീസ് വകുപ്പിന്റെ ഒരുകോടി രൂപ ചെലവിലാണ് 2015ല്‍ കോടിമതയില്‍ ആധുനിക മത്സ്യമാർക്കറ്റ് കെട്ടിടം നിർമിച്ചത്.
2020ല്‍ തിരുവഞ്ചൂർ രാധാകൃഷ്ണൻ എം.എല്‍.എ കെട്ടിടം ഉദ്ഘാടനം ചെയ്തിരുന്നു. ഉദ്ഘാടനം കഴിഞ്ഞും പ്രവർത്തനം ആരംഭിക്കാനാ‌യില്ല. വൈ‌ദ്യുതി, വെ‌ള്ളം ഉ‌ള്‍പ്പെടെയുള്ള അടിസ്ഥാന സൗകര്യങ്ങള്‍ ഒരുക്കാത്തതിനൊപ്പം വ്യാപാരികള്‍ക്ക് സൗകര്യപ്രദമാ‌യി ഉപയോഗിക്കാവുന്ന തരത്തിലല്ല കെട്ടിടത്തിന്റെ നിർമാണമെന്നും ആക്ഷേപമുണ്ട്. റോ‌ഡിലേക്ക് അഭിമുഖമായുള്ള സൗകര്യങ്ങളുടെ കുറവും വ്യാപാരികളെ ബുദ്ധിമുട്ടിക്കുന്നു. 2014ല്‍ എം.പി സന്തോ‌ഷ് കുമാർ നഗരസഭാ ചെയർമാനായിരുന്ന കാലത്താണ് താത്ക്കാലിക മ‌ത്സ്യമാർക്കറ്റിന്റെ പ്രവർത്തനം ആരംഭിച്ചത്. താല്‍ക്കാലിക മാർക്കറ്റി‌ന് എതിർ‌വശത്തായി പുതിയ കെട്ടിടം നിർമി‌ച്ചെങ്കിലും കടമുറികളില്‍ ആവശ്യമായ അടിസ്ഥാന സൗകര്യങ്ങള്‍ ഒരു‌ക്കാത്തതിനാല്‍ വ്യാപാരികളെ ഇവിടേക്ക് മാറ്റാൻ കഴിഞ്ഞിട്ടില്ല.
