കൊച്ചി: കേരള മെഡിക്കല് സർവിസസ് കോർപ്പറേഷൻ (കെ.എം.എസ്.സി.എല്) സംഭരണശാലകളില് നിലവില് 120 കോടി രൂപയുടെ മരുന്നുകള് സൂക്ഷിച്ചിട്ടുണ്ടെന്ന് വിവരാവകാശ രേഖ.
ഇതില് പലതും കാലാവധി കഴിഞ്ഞവ. സംസ്ഥാനത്തെ സർക്കാർ ആശുപത്രികളില് മരുന്ന് ക്ഷാമം രൂക്ഷമാണെന്ന പരാതിക്കിടയിലാണ് കോർപ്പറേഷൻ്റെ സംഭരശാലകളില് കാലാവധി കഴിഞ്ഞതുള്പ്പെടെ കോടികളുടെ മരുന്ന് കെട്ടിക്കിടക്കുന്നുവെന്ന വിവരം പുറത്തുവരുന്നത്.
16 സംഭരണ ശാലകളിലായാണ് 120 കോടി രൂപയുടെ മരുന്നുകള് സ്റ്റോക്ക് ചെയ്തിരിക്കുന്നത് എന്ന് വിവരാവകാശ നിയമമനുസരിച്ചുള്ള ചോദ്യത്തിനുള്ള മറുപടിയില് കോർപ്പറേഷൻ വ്യക്തമാക്കുന്നു.
കഴിഞ്ഞ 10 വർഷത്തിനിടെ 5,576.30 കോടി രൂപയാണ് കേരള മെഡിക്കല് സർവിസസ് കോർപ്പറേഷൻ മരുന്ന് വാങ്ങാനായി ചെലവഴിച്ചത്.
14 ജില്ല ആസ്ഥാനങ്ങള്ക്ക് പുറമേ തിരൂർ, മഞ്ചേരി എന്നിവിടങ്ങളിലുമായി സ്ഥിതിചെയ്യുന്ന 16 സംഭരണശാലകളിലാണ് കോർപ്പറേഷൻ മരുന്ന് സൂക്ഷിച്ചിരിക്കുന്നതെന്ന് വിവരാവകാശ പ്രവർത്തകൻ രാജു വാഴക്കാലക്ക് നല്കിയ മറുപടിയില് അധികൃതർ വ്യക്തമാക്കി.
ഏറ്റവും അധികം സൂക്ഷിച്ചിരിക്കുന്നത് തിരുവനന്തപുരത്തെ സംഭരണശാലയിലാണ്.25 കോടി വരുമിത്. സൂക്ഷിച്ചിരിക്കുന്ന മരുന്നുകളില് കാലാവധി കഴിഞ്ഞവയുണ്ടെങ്കിലും ഏതൊക്കെ മരുന്നുകളാണ് കാലാവധി കഴിഞ്ഞതെന്നോ ഇതിൻ്റെ മൂല്യം എത്രയെന്നോ മറുപടിയില് വ്യക്തമാക്കിയിട്ടില്ല. ഇത്തരം വിവരങ്ങള് ക്രോഡീകരിച്ചു സൂക്ഷിച്ചിട്ടില്ല എന്നാണ് കോർപ്പറേഷൻ വ്യക്തമാക്കുന്നത്.
സാധാരണഗതിയില് ഓരോ വർഷം അവസാനിക്കുമ്പോഴും കാലാവധി കഴിഞ്ഞ മരുന്നുകള് ശേഖരിച്ച് നശിപ്പിക്കുകയാണ് പതിവ്.
എന്നാല് കഴിഞ്ഞ അഞ്ചു വർഷമായി ഈ പ്രവർത്തനം നടക്കാത്തതിനാലാണ് സംഭരണശാലകളില് ഇത്തരം മരുന്നുകള് കെട്ടിക്കിടക്കാൻ ഇടവരുന്നത് എന്നും വിശദീകരിക്കുന്നുണ്ട്.
