കോട്ടയം: കോട്ടയം സർക്കാർ മെഡിക്കല്‍ കോളേജില്‍ 270 കോടി രൂപ ചെലവില്‍ നിർമിച്ച പുതിയ സർജിക്കല്‍ ബ്ലോക്കിന്റെ നിർമാണവുമായി ബന്ധപ്പെട്ട് ഉയർന്ന ഗുരുതര ആരോപണങ്ങളില്‍ വിജിലൻസ് അന്വേഷണം ആവശ്യപ്പെട്ട് ആരോഗ്യ-ദേവസ്വം മന്ത്രി കെ. മുരളീധരൻ.
നിർമാണത്തിലെ ക്രമക്കേടുകള്‍, സാങ്കേതിക പിഴവുകള്‍, പ്രവൃത്തി നിർവഹണത്തിലെയും മേല്‍നോട്ടത്തിലെയും വീഴ്ചകള്‍, സാമ്പത്തിക ക്രമക്കേടുകള്‍ എന്നിവ സമഗ്രമായി അന്വേഷിക്കണമെന്ന് ആവശ്യപ്പെട്ട് ആഭ്യന്തരവകുപ്പ് മന്ത്രി രമേശ് ചെന്നിത്തലയ്ക്ക് കത്ത് നല്‍കി.
ഇത് കൂടാതെ കെട്ടിടത്തിന്റെ സുരക്ഷ ഉറപ്പാക്കുന്നതിനായി സാങ്കേതിക സമിതിയെ നിയോഗിച്ച്‌ പരിശോധന നടത്താൻ ആരോഗ്യവകുപ്പ് അഡീഷണല്‍ ചീഫ് സെക്രട്ടറിയോടും മന്ത്രി ആവശ്യപ്പെട്ടു.
കെട്ടിടത്തിന്റെ ഘടനാപരമായ സുരക്ഷ വിലയിരുത്താനും നിർമാണത്തിലെ പിഴവുകളും പോരായ്മകളും കണ്ടെത്താനുമാണ് നിർദേശം. പരിശോധനയിലൂടെ കണ്ടെത്തുന്ന ന്യൂനതകള്‍ പരിഹരിക്കുന്നതിനും ആവശ്യമായ അടിയന്തര സുരക്ഷാ നടപടികള്‍ സ്വീകരിക്കാനും അഡീഷണല്‍ ചീഫ് സെക്രട്ടറിയെ ചുമതലപ്പെടുത്തി.
2026 ഫെബ്രുവരി 16നാണ് കഴിഞ്ഞ സർക്കാർ പുതിയ സർജിക്കല്‍ ബ്ലോക്ക് ഉദ്ഘാടനം ചെയ്തത്. മാസങ്ങള്‍ക്കുള്ളില്‍ത്തന്നെ കെട്ടിടത്തിലെ സീലിംഗ് പലതവണ തകർന്നുവീണത് വലിയ ആശങ്കയ്ക്കിടയാക്കി.
രോഗികളുടെയും ഡോക്ടർമാരുടെയും മറ്റ് ജീവനക്കാരുടെയും ജീവന് ഭീഷണിയാകുന്ന തരത്തിലാണ് ഇത്തരം സംഭവങ്ങള്‍ ആവർത്തിക്കുന്നത്.
സീലിങ് തകർച്ചയ്ക്കു പുറമെ കെട്ടിടത്തിന്റെ സിവില്‍, പ്ലംബിങ്, ഇലക്‌ട്രിക്കല്‍ ജോലികളിലും ഗുരുതരമായ അപാകതകള്‍ റിപ്പോർട്ട് ചെയ്തിട്ടുണ്ട്.
സാങ്കേതിക മാനദണ്ഡങ്ങള്‍ പാലിച്ചാണോ നിർമാണം നടത്തിയത്, നിർമാണത്തിന്റെ ഗുണനിലവാരം ഉറപ്പാക്കാൻ ആവശ്യമായ പരിശോധനകളും മേല്‍നോട്ടവും ഉണ്ടായിരുന്നോ തുടങ്ങിയ കാര്യങ്ങള്‍ വിശദമായി പരിശോധിക്കേണ്ടതുണ്ടെന്ന് മന്ത്രി കെ. മുരളീധരൻ പറഞ്ഞു.
നിർമാണച്ചുമതല ജതാൻ കണ്‍സ്ട്രക്ഷനാണ് നല്‍കിയിരുന്നതെങ്കിലും പ്രവൃത്തികള്‍ മറ്റ് ഏജൻസികള്‍ക്ക് ഉപകരാർ നല്‍കിയതായും ആരോപണമുണ്ട്. കരാർ വ്യവസ്ഥകള്‍ പാലിച്ചിരുന്നോ, ഉപകരാർ നല്‍കുന്നതില്‍ ചട്ടലംഘനങ്ങളുണ്ടായോ, നിർമാണപ്രവൃത്തികളുടെ നിർവഹണത്തിലും മേല്‍നോട്ടത്തിലും വീഴ്ചകളുണ്ടായോ തുടങ്ങിയ കാര്യങ്ങളും അന്വേഷണത്തിന്റെ പരിധിയില്‍ വരും.
