ഏറ്റുമാനൂര്‍: നഗരസഭയെയും വിജയപുരം പഞ്ചായത്തിനെയും ബന്ധിപ്പിക്കുന്ന കിണറ്റുംമൂട്‌ പാലം അപകടാവസ്‌ഥയില്‍.
മീനച്ചിലാറിനു കുറുകെയുള്ള ഈ പാലം 2012 ല്‍ നിര്‍മ്മിച്ചതാണ്‌. പാലത്തിന്റെ ഗര്‍ഡറുകളും തകിടുകളും കമ്പിയും പൂര്‍ണമായ ദ്രവിച്ച നിലയിലാണ്‌.
വിനോദസഞ്ചാരികളടക്കം നൂറ്‌ കണക്കിനാളുകളാണ്‌ ഈ പാലത്തിലൂടെ കടന്നു പോകുന്നത്‌.
വന്‍ ദുരന്തം ഒഴിവാക്കാനായി ജില്ലാ ഭരണകൂടവും തദ്ദേശ ഭരണകൂടവും അടിയന്തിരമായി ഇടപെടണമെന്നാണ്‌ നാട്ടുകാരുടെ ആവശ്യം.
ഇതിനായി എന്‍ജിനീയറിങ്ങ്‌ വിഭാഗത്തെകൊണ്ട്‌ പാലത്തിന്റെ സുരക്ഷാ സ്‌ഥിതിയും പാലത്തിന്റെ സ്‌റ്റീല്‍ കേബിളുകളും പരിശോധിക്കണമെന്നും ആവശ്യമുണ്ട്‌. താല്‍ക്കാലിക ഗതാഗത നീയന്ത്രണം ഏര്‍പ്പെടുത്തണമെന്നും ഇവര്‍ പറയുന്നു.
താത്‌കാലിക പരിശോധന കഴിയുന്നതുവരെ പാലത്തിലൂടെയുള്ള യാത്രക്കാരുടെ എണ്ണം പരിമിതപ്പെടുത്തുകയോ ആളുകളെ കയറ്റാതിരിക്കുകയോ ചെയ്യുക.
തുരുമ്പെടുത്ത കേബിളുകള്‍, കേടുപാടുകള്‍ സംഭവിച്ച കൈവരികള്‍, തടികള്‍,പ്ലാറ്റഫോമുകള്‍ എന്നിവ യുദ്ധകാലാടിസ്‌ഥാനത്തില്‍ മാറ്റുക, ഭാവിയില്‍ അപകടങ്ങള്‍ ഒഴിവാക്കാന്‍ കൃത്യമായ സമയപരിധിക്കുള്ളില്‍ പാലത്തിന്റെ അറ്റകുറ്റപ്പണി ഉറപ്പാക്കുന്ന സംവിധാനം ഏര്‍പ്പെടുത്തുക എന്നതാണ്‌ പ്രധാന നിര്‍ദ്ദേശങ്ങള്‍ 2015 മുതല്‍ പൗരസമിതി പ്രസിഡൻ്റും പരിസ്‌ഥിതി പ്രവര്‍ത്തകനുമായ മോന്‍സി പെരുമാലില്‍ അധികൃതര്‍ക്ക്‌ മുന്നില്‍ ഈ വിഷയം നിരന്തരം ഉന്നയിക്കുകയും നിവേദനങ്ങള്‍ നല്‍കുകയും ചെയ്‌തിട്ടുള്ളതാണ്‌.
എന്നാല്‍ വര്‍ഷം
പത്ത്‌ കഴിഞ്ഞിട്ടും പാലം നവീകരിക്കാനോ, അറ്റകുറ്റപ്പണി നടത്തി ബലപ്പെടുത്താനോ, അപകടകരമായ ഈ പാലം പൊളിച്ചുമാറ്റാനോ ബന്ധപ്പെട്ടവരുടെ ഭാഗത്തുനിന്ന്‌ യാതൊരു നടപടിയും ഉണ്ടായിട്ടില്ല.
