വൈക്കം:ഓണത്തോടനുബന്ധിച്ച് വൈക്കത്ത് ഖാദിമേളയ്ക്ക് തുടക്കമായി. വൈക്കം ബ്ലോക്ക് പഞ്ചായത്തിലെ വൈക്കം മുഹമ്മദ് ബഷീർ സ്മാരക ഹാളിൽ ആരംഭിച്ച മേള വൈക്കം ബ്ലോക്ക് പഞ്ചായത്ത് പ്രസിഡൻ്റ് കെ.കെ.ശശികുമാർ ഉദ്ഘാടനം ചെയ്തു.
ഭാരതത്തിൻ്റെ സ്വാതന്ത്ര്യ സമരത്തിൽ രാജ്യത്തെ മനുഷ്യരെയാകെ ഒന്നിപ്പിക്കുന്നതിൽ വലിയ പങ്കുവഹിച്ച ഖാദിയുടെ വലിയ പ്രചാരകനായിരുന്നു നമ്മുടെ രാഷ്ട്രപിതാവ് മഹാത്മജിയെന്നും ഖാദി നെയ്ത്തു വ്യവസായം വലിയ പ്രതിസന്ധിനേരിടുന്ന ഈ കാലത്ത് ഖാദി ഉൽപന്നങ്ങൾ വാങ്ങി പരമ്പരാഗത വ്യവസായത്തിന് പിൻബലമേകേണ്ടത് ഓരോരുത്തരുടെയും കടമയാണെന്നും ബ്ലോക്ക് പഞ്ചായത്ത് പ്രസിഡൻ്റ് കെ.കെ. ശശികുമാർ പറഞ്ഞു.
ബ്ലോക്ക് പഞ്ചായത്ത് സ്റ്റാൻഡിംഗ് കമ്മറ്റി ചെയർമാൻ പി.വി. ഹരിക്കുട്ടൻ അധ്യക്ഷത വഹിച്ചു. ഖാദി ഉൽപന്നങ്ങൾ 30 ശതമാനം റിബേറ്റിലാണ് വിപണന മേളകളിൽ വിൽക്കുന്നത്. ഉദയനാപുരം ഖാദി ഗ്രാമ സൗഭാഗ്യ വിപണന കേന്ദ്രത്തിലും വൈക്കം എസ് ബി ഐ പ്രവർത്തിക്കുന്ന വ്യാപാര സമുച്ചയത്തിലെ ഗ്രൗണ്ട് ഫ്ലോറിലും ചെമ്പ് ബ്രഹ്മമംഗലം ഖാദി യൂണിറ്റ് ഗ്രാമ ശ്രീയിലും 25 വരെ ഓണ വിപണണിയുടെ റിബേറ്റ് ഉപഭോക്താക്കൾക്ക് ലഭിക്കും.
ബ്ലോക്ക് പഞ്ചായത്ത് അംഗം ടി.എൻ.സിബി, ബ്ലോക്ക് പഞ്ചായത്ത് സെക്രട്ടറി കെ. അജിത്ത്കുമാർ, വൈക്കം ഖാദി ഭവൻ മാനേജർ ഷെല്ലിജോസഫ്, ഉദയനാപുരം ഖാദി ഭവൻ മാനേജർ ജി. സുലോചന, ഉദയനാപുരം ഖാദി യൂണിറ്റ് ഇൻസ്ട്രക്ടർ പി. എസ്. സന്തോഷ് തുടങ്ങിയവർ സംബന്ധിച്ചു.
