കോട്ടയം: "ശ്യാമ സുന്ദര കേരകേദാര ഭൂമി..." . എല്ലാ വായനാക്കാർക്കും തേർഡ് ഐ ന്യൂസിൻ്റെ കേരളപ്പിറവി ആശംസകൾ
1956 നവംബർ ഒന്നിന് ഐക്യകേരളം രൂപീകൃതമായതിന്റെ 70-ാം ജന്മദിനം ഇന്ന് കേരളീയർ പ്രൗഢിയോടെ ആഘോഷിക്കുകയാണ്.
മാതൃഭാഷയുടെ മധുരവും കസവിന്റെ പ്രൗഢിയും സമന്വയിക്കുന്ന ഈ ചരിത്രദിനം ലോകത്ത് എവിടെയാണെങ്കിലും മലയാളികള്‍ ആഘോഷിക്കാൻ മറക്കില്ല. ലോകമെമ്പാടുമുള്ള മലയാളികള്‍ തങ്ങളുടെ നാടിൻ്റെ പിറന്നാള്‍ ആഘോഷിക്കുന്ന ഈ വേളയില്‍ അതിൻ്റെ ചരിത്രവും പ്രത്യേകതയും നമ്മള്‍ അറിയാതെ പോകരുത്. വരും തലമുറയ്ക്ക് പകർന്ന് നല്‍കാൻ ആ സുവർണ നാളുകളുടെ ഓർമകളിലേക്ക് ഒരിക്കല്‍ കൂടി തിരിഞ്ഞുനോക്കാം.
കേരളപ്പിറവിയുടെ ചരിത്രം
കേരള, കേരളം എന്ന പേര് മാറ്റത്തിന് ശേഷമുള്ള ആദ്യ പിറവി എന്നതാണ് ഇക്കൊല്ല ഏറ്റവും വലിയ പ്രത്യേകത. 1956 നവംബർ ഒന്നിന് തിരുവിതാംകൂർ, കൊച്ചി, മലബാർ എന്നീ പ്രദേശങ്ങള്‍ കൂട്ടിച്ചേർത്ത് കേരള സംസ്ഥാനം രൂപീകരിച്ചത്. നമ്മുടെ സ്വന്തം കേരളത്തിന് ഇന്ന് 70 വയസ്സ് തികയുകയാണ്. സപ്തതിയുടെ നിറവിലുള്ള മലയാള നാട്ടില്‍ പിറന്നതിലും ജീവിക്കുന്നതിലും ഓരോ നിമിഷവും അഭിമാനിക്കുന്നവരാണ് നമ്മള്‍ മലയാളികള്‍.
എല്ലാ വർഷവും നവംബർ ഒന്നിനാണ് നമ്മള്‍ കേരളപ്പിറവി ദിനം ആചരിക്കുന്നത്. 1956 നവംബർ 1-ന് ഫസല്‍ അലി കമ്മീഷന്റെ ശുപാർശയോടെ തിരുവിതാംകൂർ, കൊച്ചി, മലബാർ എന്നീ പ്രദേശങ്ങള്‍ ഒന്നിച്ചുചേർന്ന് ഐക്യകേരളം പിറവികൊണ്ടു. വിദ്യാഭ്യാസം, ആരോഗ്യം, സാക്ഷരത, സാമൂഹിക പരിഷ്കരണം എന്നിവയില്‍ ലോക ശ്രദ്ധയാകർഷിച്ച സവിശേഷമായ 'കേരള മോഡല്‍' വികസനപാതയില്‍ 70 വർഷം നമ്മള്‍ വിജയകരമായി പൂർത്തിയാക്കുകയാണ് ഇന്ന്.
ഏകദേശം 580 കിലോമീറ്റർ കടല്‍ത്തീരമുള്ള കേരളത്തിലെ 14 ജില്ലകളില്‍ 9 ജില്ലകള്‍ കടലിനോട് ചേർന്നുക്കിടക്കുന്നവയാണ്. 44 നദികള്‍ കേരളത്തിലൂടെ ഒഴുകുന്നതില്‍ 41 എണ്ണം പടിഞ്ഞാറോട്ടും മൂന്ന് എണ്ണം കിഴക്കോട്ടുമാണ് ഒഴുകുന്നത്. തീരസമതലങ്ങള്‍, ഇടനാട്, ഹൈറേഞ്ച്/മലയോര മേഖലകള്‍ എന്നിങ്ങനെ മൂന്നു പ്രധാന മേഖലകളായി തിരിച്ചതാണ് നമ്മുടെ ഈ കൊച്ചു കേരളം. 1956-ലെ സംസ്ഥാന പുനഃസംഘടനാ നിയമമാണ് കേരളത്തിന്റെ രൂപീകരണത്തിനും മറ്റു പല സംസ്ഥാനങ്ങളുടെ രൂപീകരണത്തിനും ആധാരമായത്.
എന്നാല്‍ കേരളം രൂപംകൊണ്ടതിന് ശേഷം ചില പ്രദേശങ്ങള്‍ നമ്മുടേത് അല്ലാതായി മാറുകയുണ്ടായി. അതായത് തമിഴ്നാടിൻ്റെ കന്യാകുമാരി ജില്ല. തിരുവിതാംകൂറില്‍ നിന്ന് വേർപെടുത്തിയ തോവാളം, അഗസ്തീശ്വരം, കല്‍ക്കുളം, വിളവങ്കോട് എന്നീ നാല് താലൂക്കുകളും ചെങ്കോട്ട താലൂക്കിന്റെ ഒരു ഭാഗവും മദ്രാസ് സംസ്ഥാനത്തോട് ചേർന്നു മാറുകയാണ് ഉണ്ടായത്. രൂപീകൃതമാകുമ്പോള്‍ ഇന്ത്യയിലെ സംസ്ഥാനങ്ങളില്‍ ഏറ്റവും ചെറിയ സംസ്ഥാനമായിരുന്നു നമ്മുടെ കേരളം.
