തിരുവനന്തപുരം : സംസ്ഥാനത്ത് ഒറ്റപ്പെട്ട ഇടങ്ങളില് ശക്തമായ മഴയ്ക്ക് സാധ്യത. ഇന്ന് മൂന്ന് ജില്ലകളില് മഴ മുന്നറിയിപ്പുണ്ട്. കോട്ടയം, ഇടുക്കി, എറണാകുളം ജില്ലകളില് യെല്ലോ അലേര്ട്ടാണ് പ്രഖ്യാപിച്ചിരിക്കുന്നത്. നാളെയും മൂന്ന് ജില്ലകളില് യെല്ലോ അലേര്ട്ടുണ്ട്. നാളെ കൊല്ലം, പത്തനംതിട്ട, കോട്ടയം ജില്ലകളിലാണ് യെല്ലോ അലേര്ട്ട് പ്രഖ്യാപിച്ചിരിക്കുന്നത്. ഒറ്റപ്പെട്ടയിടങ്ങളില് ഇടിമിന്നല് മുന്നറിയിപ്പുമുണ്ട്.
സംസ്ഥാനത്ത് കഴിഞ്ഞ കുറച്ചുനാളുകളായി താപനില ഉയര്ന്ന നിലയിലാണ്. ഇന്നലെയും കടുത്ത ചൂടാണ് അനുഭവപ്പെട്ടത്. മലയോര ജില്ലകളിലും ഉയര്ന്ന പ്രദേശങ്ങളിലും സമാനമായ അവസ്ഥയാണ് നിലനില്ക്കുന്നത്. മഴ കുറഞ്ഞത് വൈദ്യുതി പ്രതിസന്ധി രൂക്ഷമാക്കിയിട്ടുണ്ട്. രാത്രി കാലങ്ങളില് തുടര്ച്ചായി പല സമയങ്ങളില് കറണ്ട് പോകുന്നുണ്ട്. പ്രതിസന്ധി രൂക്ഷമാകുമ്പോഴും കൃത്യമായ പരിഹാരം കാണാന് സര്ക്കാര് തയ്യാറാകുന്നില്ലെന്ന് വ്യാപക പരാതിയുണ്ട്.
അതിനിടെ കള്ളക്കടല് പ്രതിഭാസത്തിന്റെ ഭാഗമായി വിവിധ ജില്ലകളിലെ തീരപ്രദേശങ്ങളില് കടലാക്രമണത്തിന് സാധ്യതയുള്ളതായി ദേശീയ സമുദ്ര വിവര വിശകലന കേന്ദ്രം അറിയിച്ചു. കൊല്ലം, എറണാകുളം, തൃശൂര്, കോഴിക്കോട്, കാസര്കോട് ജില്ലകളിലെ തീരപ്രദേശങ്ങളിലാണ് കടലാക്രമണ സാധ്യതയുള്ളത്. രാത്രി 8.30 വരെ 0.8 മുതല് 1.5 മീറ്റര് വരെ ഉയര്ന്ന തിരമാലയ്ക്ക് സാധ്യതയുണ്ട്. കടലാക്രമണ സാധ്യതയുള്ളതിനാല് മത്സ്യത്തൊഴിലാളികളും തീരദേശവാസികളും ജാഗ്രത പാലിക്കണമെന്നും ദേശീയ സമുദ്ര വിവര വിശകലന കേന്ദ്രം അറിയിച്ചു.
