തിരുവനന്തപുരം: കെസിഎ പിങ്ക് വനിതാ ട്വന്റി 20 ചാമ്പ്യന്ഷിപ്പില് സഫയര് ചാമ്പ്യന്മാര്. ഫൈനലില് എമറാള്ഡിനെ 28 റണ്സിന് തോല്പ്പിച്ചാണ് സഫയര് കിരീടം ഉയര്ത്തിയത്.
ആദ്യം ബാറ്റ് ചെയ്ത സഫയര് 20 ഓവറില് നാല് വിക്കറ്റ് നഷ്ടത്തില് 131 റണ്സെടുത്തു. മറുപടി ബാറ്റിങ്ങിനിറങ്ങിയ എമറാള്ഡിന് 20 ഓവറില് എട്ട് വിക്കറ്റ് നഷ്ടത്തില് 103 റണ്സ് മാത്രമാണ് നേടാനായത്.
ടോസ് നഷ്ടപ്പെട്ട് ആദ്യം ബാറ്റ് ചെയ്ത സഫയറിന് മാളവിക സാബുവും ഇ. ബി. വിസ്മയയും ചേര്ന്ന രണ്ടാം വിക്കറ്റ് കൂട്ടുകെട്ടാണ് മുതല്ക്കൂട്ടായത്. ഇരുവരും ചേര്ന്ന് 71 റണ്സ് കൂട്ടിച്ചേര്ത്തു. മാളവിക 31 റണ്സെടുത്തു. വിസ്മയ 48 പന്തുകളില് നിന്ന് എട്ട് ഫോറും ഒരു സിക്സുമടക്കം 64 റണ്സുമായി പുറത്താകാതെ നിന്നു. ക്യാപ്റ്റന് സജന സജീവന് 15-ഉം സൂര്യ സുകുമാര് 10-ഉം റണ്സെടുത്തു. എമറാള്ഡിനു വേണ്ടി ശ്രേയ റോയ്, സി. വി. അനുഷ്ക, നജ്ല എന്നിവര് ഓരോ വിക്കറ്റ് വീതം വീഴ്ത്തി.
മറുപടി ബാറ്റിങ്ങിനിറങ്ങിയ എമറാള്ഡ് ബാറ്റിങ് നിരയില് മൂന്ന് പേര് മാത്രമാണ് രണ്ടക്കം കണ്ടത്. മുന്നിരയും മധ്യനിരയും തകര്ന്നടിഞ്ഞപ്പോള് 33 പന്തുകളില് നിന്ന് 51 റണ്സുമായി പുറത്താകാതെ നിന്ന മനസ്വി പോറ്റിയാണ് എമറാള്ഡിന്റെ സ്കോര് 100 കടത്തിയത്. പി. ആര്. വൈഷ്ണ 22-ഉം ബി. സൗപര്ണ്ണിക 11-ഉം റണ്സ് നേടി. സഫയറിനു വേണ്ടി ടി. ഷാനി മൂന്നും സൂര്യ സുകുമാര് രണ്ടും വിക്കറ്റുകള് വീഴ്ത്തി. അര്ദ്ധസെഞ്ചുറി നേടിയ ഇ. ബി. വിസ്മയയാണ് 'പ്ലെയര് ഓഫ് ദി മാച്ച്'.
ടൂര്ണമെന്റിലാകെ ഒന്പത് ഇന്നിങ്സുകളില് നിന്നായി 338 റണ്സ് നേടിയ അന്സു സുനിലാണ് 'ടൂര്ണമെന്റിലെ താരം'. അന്സു തന്നെയാണ് ടൂര്ണമെന്റിലെ മികച്ച ബാറ്ററായും തിരഞ്ഞെടുക്കപ്പെട്ടത്. 12 വിക്കറ്റുകള് വീഴ്ത്തിയ ഇഷിത ഷാനി മികച്ച ബൗളറായും തിരഞ്ഞെടുക്കപ്പെട്ടു.
