തിരുവനന്തപുരം: കെസിഎ പിങ്ക് വനിതാ ട്വന്റി 20 ചലഞ്ചേഴ്സ് ചാമ്പ്യൻഷിപ്പിന് തിരുവനന്തപുരത്ത് തുടക്കമായി. ആദ്യ മത്സരത്തില് കെസിഎ റൂബിസ് കെസിഎ പേള്സിനെ തോല്പിച്ചു.
നാല് വിക്കറ്റിനായിരുന്നു റൂബീസിന്റെ വിജയം. ആദ്യം ബാറ്റ് ചെയ്ത പേള്സ് 20 ഓവറില് നാല് വിക്കറ്റ് നഷ്ടത്തില് 130 റണ്സെടുത്തു. ക്യാപ്റ്റൻ എ. അക്ഷയയുടെ അർദ്ധസെഞ്ച്വറിയാണ് പേള്സിനെ ഭേദപ്പെട്ട സ്കോറിലെത്തിച്ചത്. പി. അഖില പുറത്താകാതെ 30ഉം ശ്രേയ പി. സിജു 23ഉം റണ്സെടുത്തു. റൂബീസിനു വേണ്ടി നിത്യ ലൂർദ്ദ് രണ്ട് വിക്കറ്റുകള് വീഴ്ത്തി.
മറുപടി ബാറ്റിങ്ങിനിറങ്ങിയ റൂബീസിന് ക്യാപ്റ്റൻ ആശ ശോഭനയുടെയും എം.പി. വൈഷ്ണയുടെയും അമീറ ബീഗത്തിന്റെയും ഇന്നിംഗ്സുകളാണ് വിജയമൊരുക്കിയത്. ആശ ശോഭന 19 പന്തുകളില് നിന്ന് 35 റണ്സെടുത്തു. വൈഷ്ണ 33ഉം അമീറ 22ഉം റണ്സ് നേടി. 18.3 ഓവറില് ആറ് വിക്കറ്റ് നഷ്ടത്തില് റൂബീസ് ലക്ഷ്യത്തിലെത്തി. പേള്സിനു വേണ്ടി ഭദ്ര പരമേശ്വരനും അലീന ഷിബുവും രണ്ട് വിക്കറ്റ് വീതം വീഴ്ത്തി.
