കോട്ടയം: ഐക്യ കർഷക സംഘം കോട്ടയം ജില്ലാ കമ്മിറ്റിയുടെ നേതൃത്വത്തിൽ കാർഷിക ദിനാചരണവും മികച്ച കർഷകനെ ആദരിക്കലും സംഘടിപ്പിച്ചു. കർഷകരുടെ അധ്വാനത്തിനും കാർഷിക മേഖലയിലെ സംഭാവനകൾക്കും അംഗീകാരം നൽകുന്നതിനൊപ്പം പുതുതലമുറയിൽ കൃഷിയോടുള്ള താൽപര്യം വർധിപ്പിക്കേണ്ടതിന്റെ ആവശ്യകതയും ചടങ്ങിൽ ചൂണ്ടിക്കാട്ടി.
ജില്ലാ പ്രസിഡന്റ് ഗ്ലാഡ്സൻ ജേക്കബിന്റെ അധ്യക്ഷതയിൽ ചേർന്ന യോഗം ആർ.എസ്.പി. ജില്ലാ സെക്രട്ടറി ടി.സി. അരുൺ ഉദ്ഘാടനം ചെയ്തു. കാർഷിക മേഖല നേരിടുന്ന വെല്ലുവിളികളും കർഷകർക്ക് ആവശ്യമായ പിന്തുണയും ചടങ്ങിൽ ചർച്ചയായി. കാർഷിക മേഖലയെ കൂടുതൽ ശക്തിപ്പെടുത്തുന്നതിനും കർഷകരുടെ ഉൽപാദനക്ഷമത വർധിപ്പിക്കുന്നതിനും കൂട്ടായ പ്രവർത്തനം അനിവാര്യമാണെന്ന് ടി.സി. അരുൺ പറഞ്ഞു.
എലിക്കുളം സ്വദേശി ടി.കെ. വിനോദിനെയാണ് കാർഷിക രംഗത്തെ മികച്ച പ്രവർത്തനങ്ങൾ പരിഗണിച്ച് മികച്ച കർഷകനായി തെരഞ്ഞെടുത്തത്. ജില്ലാ പ്രസിഡന്റ് ഗ്ലാഡ്സൻ ജേക്കബും ജില്ലാ സെക്രട്ടറി സണ്ണി തറയിലും ചേർന്ന് ടി.കെ. വിനോദിനെ പൊന്നാട അണിയിച്ചും മെമെന്റോ നൽകിയും ആദരിച്ചു.
ജില്ലാ സെക്രട്ടറി സണ്ണി തറയിൽ, മുണ്ടക്കയം സോമൻ, കെ.കെ. സിജു, സ്റ്റീഫൻ ജേക്കബ്, ടിംസ് തോമസ്, പി.കെ. റസാഖ്, ജോൺ പി.എ. എന്നിവർ സംസാരിച്ചു. കർഷകരുടെ അധ്വാനത്തിന് അർഹമായ അംഗീകാരം നൽകുകയും മികച്ച കർഷകരെ മാതൃകയാക്കുകയും ചെയ്യുക എന്ന ലക്ഷ്യത്തോടെയാണ് പരിപാടി സംഘടിപ്പിച്ചതെന്ന് സംഘാടകർ അറിയിച്ചു.
