പത്തനംതിട്ട: കോന്നി കുളത്തുമണ്ണില്‍ കൂട്ടിലകപ്പെട്ട കരിമ്പുലിയെ തൃശൂർ പുത്തൂർ സുവോളജിക്കല്‍ പാർക്കിലേക്ക് മാറ്റി.
വിദഗ്ധ പരിശോധനയ്ക്കായാണ് സുവോളജി പാർക്കിലേക്ക് മാറ്റിയത്. പരിശോധനകള്‍ പൂർത്തിയാക്കിയ ശേഷം പാർക്കില്‍ തന്നെ പാർപ്പിക്കാനാണ് തീരുമാനം. കൂട്ടില്‍ അകപ്പെട്ട കേരളത്തിലെ ആദ്യത്തെ കരിമ്പുലിയായതിനാല്‍ വിശദമായ പരിശോധനയും നീരീക്ഷണവും ആവശ്യമാണെന്നാണ് വനം വകുപ്പ് പറയുന്നത്.
പെണ്‍ കരിമ്പുലിയായതിനാല്‍ പ്രജനനസാധ്യത കൂടി കണക്കിലെടുത്താണ് സുവോളജിക്കല്‍ പാർക്കിലേക്ക് മാറ്റിയതെന്നും അധികൃതർ വ്യക്തമാക്കി. ആദ്യം ഉള്‍ക്കാട്ടില്‍ തുറന്നുവിടാനാണ് തീരുമാനിച്ചിരുന്നതെങ്കിലും ഈ നീക്കത്തില്‍ എതിർപ്പുയർന്നിരുന്നു.
ഇന്നലെ വൈകിട്ടാണ് കരിമ്പുലി കൂട്ടില്‍ അകപ്പെട്ടത്. രാത്രി തന്നെ കോന്നി ഇക്കോ ടൂറിസം സെന്ററില്‍ എത്തിച്ചു. പുലർച്ചയോടെയാണ് സുവോളജിക്കല്‍ പാർക്കില്‍ എത്തിച്ചത്. ഡോക്ടറുടെ വിദഗ്ധ പരിശോധന ലഭ്യമാക്കി. ഏറെ നാളായി കോന്നിയിലും പരിസരപ്രദേശത്തും കരിമ്പുലിയുടെ സാന്നിധ്യം സ്ഥിരീകരിച്ചിരുന്നു. ഇതോടെ കനത്ത ഭീതിയിലായിരുന്നു നാട്ടുകാർ.
കലഞ്ഞൂർ പഞ്ചായത്തില്‍ നിന്ന് ഇപ്പോള്‍ പിടികൂടിയ കരിമ്പുലി ഉള്‍പ്പെടെ നാല് പുലികളെയാണ് മൂന്ന് വർഷത്തിന് ഇടയില്‍ കൂട്ടിലാക്കിയത്. പ്രദേശത്ത് വേറെയും കരിമ്പുലികള്‍ ഉണ്ടെന്നാണ് നാട്ടുകാർ പറയുന്നത്.
