തിരുവനന്തപുരം: സാമ്പത്തിക പ്രാരാബ്ധങ്ങള്‍ക്കിടയിലും സത്യസന്ധത കൈവിടാതെ മാതൃകയായി തിരുവനന്തപുരം വഴിമുക്ക് സ്വദേശി ലിയാക്കത്ത് അലി.
ദേശീയപാതയോരത്ത് നിന്ന് കളഞ്ഞുകിട്ടിയ നാലു പവനിലേറെ തൂക്കമുള്ള സ്വർണമാല ഉടമയെ കണ്ടെത്തി നല്‍കാനായി ബാലരാമപുരം പൊലീസിന് കൈമാറിയ ലിയാക്കത്തിന്റെ പ്രവൃത്തി അഭിനന്ദനീയമാണ്. വെള്ളിയാഴ്ച രാവിലെ പ്രഭാതസവാരിക്കിറങ്ങിയപ്പോഴാണ് ബാലരാമപുരം വെടിവെച്ചാൻകോവിലിന് സമീപം റോഡരികില്‍ സ്വർണമാല കിടക്കുന്നത് ലിയാക്കത്തിന്റെ ശ്രദ്ധയില്‍പ്പെട്ടത്.
സ്വർണമാണെന്ന് ഉറപ്പുവരുത്തിയ ശേഷം സുഹൃത്തുക്കളോടൊപ്പം ബാലരാമപുരം പൊലീസ് സ്റ്റേഷനിലെത്തി അദ്ദേഹം മാല കൈമാറുകയായിരുന്നു. മാല കൈമാറുമ്പോള്‍ ബാലരാമപുരം സർക്കിള്‍ ഇൻസ്പെക്ടർ കണ്ണനോട് ലിയാക്കത്ത് പറഞ്ഞ വാക്കുകള്‍ ശ്രദ്ധേയമായിരുന്നു. "സാറേ, സിസിടിവി ഒന്നുമില്ലാത്ത ദേശീയപാതയിലെ റോഡരികില്‍ നിന്നാണ് എനിക്ക് ഈ മാല കളഞ്ഞുകിട്ടിയത്. സാർ തന്നെ ഉടമയെ കണ്ടെത്തി തിരികെ ഏല്‍പ്പിക്കണം."
ബാലരാമപുരം പാതിരിയോട് സ്വദേശി രഞ്ജിത്തിന്റേതായിരുന്നു നഷ്ടപ്പെട്ട മാല. മാലയുടെ ഉടമയെ കണ്ടെത്താൻ സി.ഐ. കണ്ണന്റെ നേതൃത്വത്തില്‍ വിവിധ സ്ഥലങ്ങളിലെ സിസിടിവി ദൃശ്യങ്ങള്‍ പരിശോധിച്ചെങ്കിലും പ്രദേശത്ത് ക്യാമറകളില്ലാതിരുന്നത് അന്വേഷണത്തിന് തടസ്സമായി.
ഇതിനിടെ മാല നഷ്ടപ്പെട്ട രഞ്ജിത്ത് പരാതിയുമായി പൊലീസ് സ്റ്റേഷനിലെത്തി. മാലയുടെ കൃത്യമായ അടയാളങ്ങള്‍ വിവരിച്ചതോടെ അത് രഞ്ജിത്തിന്റേതാണെന്ന് സ്ഥിരീകരിക്കുകയും ലിയാക്കത്ത് അലിയുടെ നേതൃത്വത്തില്‍ മാല കൈമാറുകയുമായിരുന്നു. ഒരിക്കലും തിരികെ ലഭിക്കില്ലെന്ന് കരുതിയ മാല തിരിച്ചുകിട്ടിയതിന്റെ സന്തോഷത്തിലായിരുന്നു രഞ്ജിത്ത്.
അതേസമയം, സാമ്പത്തിക പ്രാരാബ്ധങ്ങള്‍ക്കിടയിലും സത്യസന്ധത കൈവിടാത്ത ലിയാക്കത്തിന്റെ നിലപാടിനെ സി.ഐ. കണ്ണൻ അഭിനന്ദിച്ചു. ലിയാക്കത്തിനെ പൂവ് നല്‍കി പൊലീസ് ആദരിച്ചു.
